Aur gefur út debet­kort með endur­greiðslu

Í tilkynningu frá Kviku segir að Aur muni bjóða upp á hagstæðustu debetkortareikninga sem völ er á. Reikningarnir eru með 4 prósent vöxtum sem greiddir eru mánaðarlega og engu stofngjaldi, árgjaldi né færslugjöldum.

Þá fá korthafar Aurs 2,6 prósent endurgreiðslu af erlendum greiðslum og allt að 10 prósent endurgreiðslu þegar verslað er hjá Vinum Aurs. Endurgreiðslurnar eru í formi Klinks, vildarkróna Aurs, sem viðskiptavinir geta notað til að borga með á markaðstorgi Aurs, breytt í sparnað hjá Auði eða sent áfram á vini, að því er segir í tilkynningunni.

„Síðustu misseri hefur verið unnið hörðum höndum að því að þróa nýja bankaþjónustu hjá Aur og nú kynnum við bestu mögulegu kjör á debetkortareikningum, auk þess sem viðskiptavinir fá borgað til baka fyrir að nota kortið,“ segir Sverrir Hreiðarsson, forstöðumaður fjártækni hjá Kviku.

„Með tilkomu Auðar á sínum tíma breytti Kvika markaðnum fyrir sparnaðarreikninga og bauð allt að tvöfalt betri vexti en þekktust. Neytendur tóku þessari nýju þjónustu vel enda eru viðskiptavinir Auðar rúmlega 45 þúsund talsins. Nú er komið að því að breyta almennri bankaþjónustu, debetkortamarkaðnum – neytendum til hagsbóta. Erlend debetkortavelta er 114 milljarðar króna á ári og endurgreiðsluhlutfall Aurs jafngilti þremur milljörðum af þeirri upphæð.“

Notendur Aurs 125 þúsund talsins

Fram kemur í tilkynningu Kviku að Aur hafi verið stofnað árið 2015 sem einföld leið til að millifæra peninga með því einu að nota símanúmer. Notendur Aurs séu nú um 125 þúsund.

„Markmið Kviku er að auka samkeppni í fjármálaþjónustu og einfalda fjármál viðskiptavina. Aur hefur verið leiðandi í fjártækni á Íslandi og með nýju bankaþjónustunni er enn eitt skrefið tekið á þeirri vegferð þar sem boðið verður upp á þjónustu sem hefur ekki verið áður í boði á íslenskum markaði. Lítil yfirbygging og vel útfærðar tæknilausnir gera okkur kleift að bjóða upp á betri kjör og snjallari nálgun en þekkist,“ segir Ármann Þorvaldsson, forstjóri Kviku.

Þá býður Aur meðal annars upp á kreditkort með 0,5 prósent endurgreiðslu af allri verslun. Þar er einnig vildarkerfið Klink, Klíkan sem heldur utan um kostnað og uppgjör sameiginlegra útgjalda vina og hópa, 5x greiðsludreifingu þar sem hægt er að dreifa kortafærslum, vörukaupum eða ógreiddum reikningum í fimm greiðslur og þrenns kongar tryggingar svo fátt eitt sé nefnt.