Fram og Afturelding unnu góða sigra

Fram hafði yfirhöndina gegn HK frá upphafi leiks og heimamenn skoruðu fyrstu fimm mörk leiksins. Framarar héldu öruggri forystu út fyrri hálfleikinn og leiddu að honum loknum, 18-13.

Heimamenn náðu átta marka forskoti í stöðunni 22-14 og sigur þeirra var í raun aldrei í hættu eftir það. Mestur varð munurinn níu mörk í stöðunni 34-25, en gestirnir klóruðu í bakkann í lokinn og niðurstaðan varð fjögurra marka sigur Fram, 39-35.

Ívar Logi Styrmisson og Reynir Þór Stefánsson skoruðu átta mörk hvor fyrir Fram í kvöld, en þeir Aron Gauti Óskarsson, Hjörtur Ingi Halldórsson og Kristján Ottó Hjálmsson voru atkvæðamestir fyrir HK með sex mörk hver.

Á sama tíma vann Afturelding góðan fimm marka sigur gegn Gróttu, 30-25. Gestirnir byrjuðu betur og náðu fjögurra marka forystu þegar fyrri hálfleikur var rétt rúmlega hálfnaður, en munurinn var kominn niður í eitt stig þegar flautað var til hálfleiks, staðan 12-13.

Afturelding tók hins vegar völdin í síðari hálfleik og vann að lokum fimm marka sigur, 30-25. Þorsteinn Leó Gunnarsson var markahæsti maður heimamanna með sex mörk, en Jakob Ingi Stefánsson skoraði átt fyrir Gróttu.