Ísrael muni „gera við Hamas það sem heimurinn gerði við ISIS“

Breska ríkisútvarpið hefur eftir John Kirby, talsmanni þjóðaröryggisráðs Bandaríkjanna, að engir hermenn verði sendir til Ísrael eða Palestínu eins og sakir standi. Bandaríkin ætli sér þó að verja hagsmuni sína á svæðinu.

Búist sé við því að Ísrael muni óska eftir auknum varnarmálastuðningi frá Bandaríkjunum, sem verði veittur eins fljótt og auðið er. Þá sagði Kirby að bandarísk yfirvöld teldu morgunljóst að yfirvöld í Íran bæru að hluta til ábyrgð á árásum Hamas-liða á almenna borgara í Ísrael um helgina, þó engar sannanir lægu fyrir um beina aðkomu Írana að árásinni að svo stöddu. 

„Íran hefur lengi stutt Hamas og önnur hryðjuverkasamtök á svæðinu með hergögnum og þjálfun,“ sagði Kirby. Þess vegna sagði hann Írana samseka.

Fyrr í kvöld greindi Joe Biden Bandaríkjaforseti frá því að minnst ellefu bandarískir ríkisborgarar hafi verið á meðal þeirra sem voru myrtir í árásum Hamas um helgina. Þá væri ótilgreinds fjölda Bandaríkjamanna enn saknað, og líklegt væri að einhverjir þeirra hefðu verið teknir í gíslingu.

Hamas sé ekki málsvari Palestínumanna

Skömmu áður en Kirby greindi frá þessu höfðu leiðtogar Bandaríkjanna, Bretlands, Frakklands, Ítalíu og Þýskalands gefið út sameiginlega yfirlýsingu þar sem Hamas-samtökin og gjörðir þeirra voru fordæmdar, og kallaðar hryðjuverk.

Yfirlýsingin var gefin út stuttu eftir sameiginlegan símafund leiðtoga ríkjanna fimm. 

„Hryðjuverk Hamas-liða eru óréttlætanleg, ólögleg og verða að lúta alþjóðlegri fordæmingu,“ segir meðal annars í yfirlýsingunni.

„Ríki okkar munu styðja Ísrael í viðleitni sinni til að verja sig og borgara sína gegn slíkum grimmdarverkum. Þetta er ekki tíminn fyrir þá sem óvinveittir eru Ísrael til að nýta sér árásirnar sér til framdráttar.“

Þá segir í yfirlýsingunni að raunverulegar vonir Palestínumanna um frið og bætt kjör séu teknar til greina. Stuðningur ríkjanna nái til aðgerða sem miði að frelsi og réttlæti fyrir Ísraela jafnt sem Palestínumenn.

„En eitt skal vera á hreinu: Hamas er ekki í forsvari fyrir þessar vonir, og getur ekki boðið fólki í Palestínu neitt nema meiri hrylling og blóðsúthellingar.“

Árásum Ísraels linni ekki strax

Paul Adams, fréttaritari BBC á sviði alþjóðamála, segir líklegt að blóðsúthellingunum muni einmitt ekki linna, og að atburðarásin sé farin að taka á sig mynd sem líkist fyrri átakalotum á svæðinu.

„Ísraelsmenn vita að sú bylgja alþjóðlegrar samúðar og góðvildar sem nú gengur yfir gefur her þeirra tímabundið tækifæri til að fara í yfirgripsmiklar hernaðaraðgerðir á Gasaströnd,“ skrifar Adams. 

Hann hefur eftir fyrrum embættismanni innan ísraelska stjórnkerfisins að stjórnvöld telji sig nú hafa minnst tvær vikur áður en að ákall Bandaríkjamanna eftir því að herinn dragi úr umsvifum sínum og aðgerðum verði of hávært til að hundsa.

„Ef Ísrael ætlar sér raunverulega að leggja stein í götu Hamas mun það óumflýjanlega leiða til mikilla átaka á jörðu niðri, og dauðsföllum almennra borgara, sem þegar eru fjölmörg, mun líklega fjölga til muna.“ 

Það sem flæki stöðuna enn meira séu möguleg afdrif þeirra gísla sem Hamas hafi tekið um helgina.

„Embættismaðurinn fyrrverandi sagði mér að ef Hamas myndi drepa þessa almennu borgara, þá myndi Ísrael „gera við Hamas það sem heimurinn gerði við ISIS og al-Qaeda“.“