Fagnar afmæli sjö mánuðum eftir að banalegan hófst

Jason Carter, barnabarn Jimmy Carter, sagði í samtali við New York Times að aðstandendur forsetans fyrrverandi kvöddu hann þegar hann fór á líknandi meðferð. Hann flutti því aftur í hús sem hann og eiginkona hans hafa búið í frá árinu 1961.

„Ég var á sjúkrahúsinu með honum og kvaddi hann á. Við bjuggumst við að þessu myndi ljúka á einni viku og núna eru liðnir sjö mánuði,“ sagði Jason Carter.

Í frétt New York Times segir að engin sérstök veikindi hafi leitt til þess að Carter hafi tekið þá ákvörðun að fara á líknandi meðferð. Hann hafi verið orðinn þreyttur á því að fara ítrekað á sjúkrahús.

Enginn forseti Bandaríkjanna hefur lifað lengur en Jimmy Carter. Hann fæddist árið 1924 í Georgíu í Bandaríkjunum. Hann varð 39. forseti Bandaríkjanna árið 1977 en sat bara eitt kjörtímabil í Hvíta húsinu.

Þrátt fyrir að vera hafnað af kjósendum á sínum tíma hefur Carter unnið sér sess í hjarta Bandaríkjamanna með miklum góðgerðarstörfum í gegnum árinu. Hann fékk friðarverðlaun Nóbels árið 2002 fyrir og vinnu í að finna friðsamar lausnir á deilum á alþjóðasviðinu, störf í þágu lýðræðis og mannréttinda og fyrir góðgerðastörf sín.

Á undanförnum árum hefur Carter varið miklum tíma í góðgerðastarf í Bandaríkjunum og í að byggja hús fyrir illa statt fólk. 

Hann hefur einnig átt við veikindi og heilsukvilla að stríða og greindist meðal annars með krabbamein í lifur árið 2015. Læknum tókst þó að fjarlægja það. Hann féll einnig nokkrum sinnum árið 2019 og braut meðal annars mjöðm.

NYT hefur eftir fjölskyldumeðlimum Carters að frá því hann fór af sjúkrahúsinu og heim til sín í Georgíu hafi honum borist mikið af lofræðum og kveðjum. Í raun má segja að hann hafi fengið að hlusta á og lesa líkræður sínar og segir fjölskylda hans að hann sé mjög þakklátur fyrir öll hlýju orðin.

Stofnunin Carter Center hefur beðið stuðningsmenn og fólk sem Carter hefur haft áhrif á um að senda inn afmæliskveðjur og minningar. Búa á til stafræna mósaík úr þessum kveðjum og skilaboðum sem Carter mun svo skoða með fjölskyldu sinni. Almenningur mun einnig fá aðgang í verkinu.

Fjölmargar kveðjur hafa borist á fyrstu dögunum.