Valskonur eru meistarar meistaranna

Gestirnir frá Vestmannaeyjum byrjuðu leikinn mun betur og skoruðu fyrstu fjögur mörk leiksins. Eyjakonur héldu fjögurra marka forskoti fyrstu tíu mínútur leiksins, en eftir það fóru Valskonur að saxa á forskotið.

Valur jafnaði loks metin í stöðunni 10-10 þegar um tólf mínútur voru eftir af fyrri hálfleik og náði forystunni í næstu sókn í fyrsta skipti í leiknum.

Valskonur héldu forsytunni út hálfleikinn og staðan var 16-15, Val í vil, þegar flautað var til hálfleiks og liðin gengu til búningsherbergja.

Heimakonur byggðu svo upp forskot sitt hægt og rólega í síðari hálfleik og náðu fimm marka forystu í stöðunni 23-18. Þegar rétt rúmar fimm mínútur voru eftir af leiknum var munurinn svo kominn upp í sjö mörk og brekkan orðin ansi brött fyrir Eyjaliðið.

Valskonur hleyptu gestunum aldrei nálægt sér eftir það og unnu að lokum góðan sjö marka sigur, 30-23. Þórey Anna Ásgeirsdóttir var markahæst í liði Vals með átta mörk, en þær Birna Berg Haraldsdóttir og Elísa Elíasdóttir voru atkvæðamestar í liði ÍBV með sjö mörk hvor. Þá var Anna Úrsúla Guðmundsdóttir óvænt búin að sækja skóna upp í hillu og mætt í lið Vals og skoraði hún fjögur mörk fyrir liðið.