Sögð hafa látið illa á Love Is­land settinu

Þetta er full­yrt í um­fjöllun breska götu­blaðsins Daily Mail. Tökur á tíundu seríunni hafa farið fram á Mall­or­ca undan­farnar vikur en þar keppast ungir Bretar við að finna ástina.

Loka­þátturinn verður sýndur í kvöld í bresku sjón­varpi og hefur breska blaðið eftir ó­nefndum starfs­manni í fram­leiðslu­teymi þáttanna að hann geti ekki beðið eftir því að þetta klárist.

„Þetta er búið að vera langt sumar hjá mörgum í teyminu og margir hafa kvartað yfir slæmri hegðun kepp­endanna sem enn eru eftir,“ hefur miðillinn eftir starfs­manninum. Opin­ber tals­maður seríunnar segir hana hafa gengið vel og að allir séu miklir vinir.

Starfs­maðurinn segir hins­vegar við breska miðilinn að sumir kepp­endur hafi hegðað sér eins og al­gjörar príma­donnur. Þeir hafi búist við miklu af fram­leiðslu­teyminu og verið með mikla stjörnu­stæla.

„Mjög margir eru orðnir þreyttir. Einn kepp­enda hefur meira að segja verið sakaður um að hafa stolið á­fengi af setti. Þetta er allt saman orðið mjög kjána­legt. Það er eins og þau viti að endirinn nálgist og því finnst þeim þau geta hegðað sér eins og þau vilja.“