Víkingur með fimm stiga for­skot eftir sigur í toppslag

Fyrir leikinn í kvöld voru Víkingur og HK í tveimur efstu sætum deildarinnar, Víkingur með 19 stig í efsta sæti en HK í öðru sæti með 17 stig. Það var því mikið í húfi í Kórnum í kvöld.

Víkingar skoruðu fyrsta mark leiksins í kvöld. Erna Guðrún Magnúsdóttir kom liðinu yfir á 39. mínútu þegar hún skoraði gott mark eftir hornspyrnu. Staðan í hálfleik 1-0.

Á 66. mínútu jafnaði Katrín Rósa Egilsdóttir metin fyrir HK þegar hún slapp ein í gegnum vörn Víkinga. Staðan orðin 1-1 og leikurinn í járnum.

Á lokamínútunum voru það hins vegar gestirnir úr Víkinni sem voru sterkari. Á 81. mínútu kom Birta Birgisdóttir Víkingum yfir á ný og sex mínútum síðar gulltrygði Bergdís Sveinsdóttir sigurinn fyrir Víkinga þegar hún skoraði úr horni. Spurning er hvort markið verði skráð sem sjálfsmark því boltinn virtist hafa viðkomu í varnarmanni HK.

Lokatölur í Kórnum 3-1 og Víkingar eru nú með 22 stig á toppi deildarinnar en HK er áfram í öðru sæti með 17 stig. Fylkir er í þriðja sæti með 16 stig og getur náð öðru sætinu á morgun þegar liðið mætir Gróttu á heimavelli.

Frábær mæting var í Kórinn í kvöld en 650 áhorfendur voru á leiknum en það eru helmingi fleiri en mættu á leik KR og KA í Bestu deild karla um síðustu helgi.

Upplýsingar um markaskorara eru fengnar af Fótbolti.net