Frá því að niðurstaða Hæstaréttar lá fyrir hefur fjöldi ríkja hert löggjöf sína varðandi þungunarrof til muna og takmarkað aðgengi að þjónustunni verulega. Joe Biden Bandaríkjaforseti sagði í yfirlýsingu í dag að þessi ríki hefðu sett líf og heilsu kvenna í hættu og hótað heilbrigðisstarfsfólkinu sem hjálpaði þeim.
Bönn væru hins vegar aðeins byrjunin.
„Þingmenn Repúblikanaflokksins vilja banna þungunarrof á landsvísu og ganga enn lengra, með því að taka FDA-samþykkt þungunarrofslyf af markaði og gera erfiðara að nálgast getnaðarvarnir. Markmið þeirra eru öfgakennd, hættuleg og ganga gegn vilja meirihluta Bandaríkjamanna,“ sagði forsetinn.
FDA er Matvæla- og lyfjastofnun Bandaríkjanna.
One year ago, the Supreme Court took away a constitutional right from the American people, denying women the right to choose.
— President Biden (@POTUS) June 24, 2023
My Administration has taken swift and strong action but the job isn't finished until Congress codifies the protections of Roe v. Wade once and for all. pic.twitter.com/NjoQrW6Kj3
Samkvæmt skoðanakönnun NBC News sem birt var í gær er 61 prósent Bandaríkjamanna ósammála niðurstöðu Hæstaréttar og 67 prósent kvenna.
Jasmine Crockett, þingkona frá Texas, sagði árið hafa einkennst af tráma og hryllingi fyrir konur um allt land, sérstaklega í ríkjum þar sem Roe gegn Wade var „síðasta varnarlínan“. Hún sagði tíðni innlagna vegna vandamála á meðgöngu hvergi hærri en í norðurhluta Texas.
„Þeir tala fjálglega um að vernda börn en leyfið mér að spyrja að þessu: Hvað verður um þegar fædd börn móður sem deyr sökum vandamála á meðgöngu af því að hún getur ekki fengið þá þjónustu sem hún þarf vegna utanlegsfósturs?“ spurði Crockett á Twitter.
It's been a year of trauma & terror for women across the country, especially in states like Texas where Roe was our last line of defense.
— Congresswoman Jasmine Crockett (@RepJasmine) June 24, 2023
A year after SCOTUS' disastrous Dobbs decision, I'm highlighting that districts like mine and Black women in particular are hurting the most. pic.twitter.com/vfz2P44YKH
Þungunarrof hefur víða verið takmarkað við allt niður í sex vikur meðgöngu, áður en margar konur vita að þær eru óléttar, og þá eru fáar undanþágur í gildi vegna sérstakra aðstæðna.
Hópar á borð við Planned Parenthood notuðu tækifærið og lýstu yfir stuðningi við Biden og Kamölu Harris fyrir forsetakosningarnar 2024.
„Þungunarrof er heilbrigðisþjónusta. Við þörfnumst leiðtoga sem hafa skuldbundið sig til að standa vörð um það frelsi sem við njótum, ekki þeirra sem vilja svipta okkur því,“ sagði Alexis McGill Johnson, framkvæmdastjóri Planned Parenthood Action Fund.
