Keflavík tilkynnti í dag að Marley Blair væri búinn að yfirgefa félagið en sögusagnir eru í gangi að Jordan Smylie muni gera slíkt hið sama á næstunni.
„Við ræddum um starfslokasamning við þá. Þær viðræður eru einhverju leyti enn þá í gangi en mér skilst það sé búið að ganga frá því með Marley. Þetta eru forsendur fyrir því að við getum styrkt hópinn í glugganum, að aðrir fari í staðinn. Þeir náðu ekki að standast undir þeim væntingum sem gerðu voru til þeirra, stundum gengur það bara ekki upp. Þetta eru fínir leikmenn sem við óskum góðs gengis annars staðar. Vonandi náum við að styrkja okkur í glugganum,“ sagði Sigurður í viðtali við Vísi eftir leik Keflavíkur og Fylkis í kvöld.
Þá liggur fyrir að þeir Ásgeir Páll Magnússon og Guðjón Pétur Stefánsson munu yfirgefa liðið í ágúst. Það er því nær öruggt að Keflvíkingar munu styrkja hópinn þegar félagaskiptaglugginn opnar þann 18. júlí.
„Þeir eru báðir að yfirgefa okkur og fara í skóla í Bandaríkjunum í ágúst. Við þurfum að styrkja okkur í glugganum,“ svaraði Sigurður aðspurður út í breytingar á leikmannahópnum.
Svekktur með úrslit leiksins
Sigurður var óánægður að ná einungis í eitt stig úr leiknum gegn Fylki í 12. umferð Bestu-deild karla. Eftir jafnteflið er Keflavík enn þá í neðsta sæti deildarinnar, þremur stigum frá öruggu sæti.
„Ég er svekktur að hafa ekki náð að vinna þennan leik. Mér fannst við skapa meira en nóg af fínum færum til að klára þennan leik en við fórum bara illa með þau. Fylkir náði ekki að skapa sér mikið, við vissum að þeir væru hættulegir í skyndisóknum og við þurfum alltaf að hafa augu með þeim þar. Okkur tókst það nokkuð vel í gegnum allan leikinn. Þeir skora eftir eitt horn sem við ræddum um fyrir leikinn að þyrfti að passa en við sýndum karakter að koma til baka. Við vorum kannski orðnir of þreyttir í restina til að ná að setja eitt í viðbót en ég er ánægður með framlagið hjá leikmönnum mínum, maður vinnur víst ekki alltaf,“ sagði Sigurður.
„Ég á eftir að skoða það betur á vídeó [markið hjá Fylki] en ég held að Sindri Snær var að dekka Pétur og Pétur er bara einn af sterkari skallamönnum í þessari deild og Pétur vann bara einvígið. Við reyndum að forðast að gefa þeim horn en þeir fengu einhver horn og þá þarf ekki nema einn góðan bolta inn í og þá er erfitt að verjast því þegar þeir eru með góða skallamenn inn í vítateig.“
„Við fengum samt haug af færum í fyrri hálfleik til að komast yfir og sýndum svo karakter að koma til baka og jafna leikinn, ég er ánægður með það. Svo bara byggjum við ofan á þetta áfram,“ bætti Sigurður við og er bjartsýnn á framhaldið.
„Mér fannst Edon [Osmani] koma fínt inn, hann skoraði jöfnunarmarkið. Ég er búinn að vera að tönglast í því að fá meira frá honum að skora meira eða leggja upp. Það sama á við um Viktor [Andra Hafþórsson] sem kom líka inn á og lagði markið upp. Ég er ánægður með þá sem komu inn á völlinn og það setur pressu á alla hina.“
Framundan er annar stórleikur fyrir Keflavík í neðri hluta deildarinnar þar sem þeir fara í heimsókn til KR, sem eru einungis fjórum stigum á undan Keflavík eftir leiki kvöldsins.
„Það er annar baráttuleikur. Liðin í neðri hlutanum eru ekki að skera sig neitt úr, þau virðast öll vera mjög jöfn og þetta eru allt 50/50 leikir. Við höldum bara áfram og bíðum eftir að við fáum að endurheimta leikmenn. Vonandi fer að styttast í það. Aftur verð ég að minnast á þá sem komu inn af bekknum með krafti inn í leikinn, við þurfum á því að halda í næsta leik gegn KR,“ sagði Sigurður Ragnar Eyjólfsson, þjálfari Keflavíkur, að endingu.
