Hefur á­hyggjur af því að yfir­vofandi reglu­breyting muni valda á­rekstrum

Pirelli vinnur nú hörðum höndum að því að hanna og kynna til sögunnar ný dekk sem þurfa ekki á dekkjahlífum að halda. Fyrirtækið stendur fast á því að þau séu meira en nothæf í keppni og ökumenn þurfi að aðlaga akstursstíl sinn að dekkjunum ef bannið við dekkjahlífum verður samþykkt.

George Russell, ökumaður Mercedes, var einn af þeim sem tók þátt í að prófa nýju dekkin í Barcelona eftir að spænski kappaksturinn fór fram og hann hefur ýmsar efasemdir um ágæti dekkjanna.

„Ef viðhorfum til baka þá vorum við líklega ekki að prófa dekkin við réttar aðstæður eða á réttri braut. Í Barcelona er í kringum 40 stiga brautarhiti og brautin full af gúmmíi eftir kappakstur helgarinnar. Dekkin voru nokkuð vafasöm þegar maður lagði af stað út á braut, en þau voru þó orðin nokkuð góð í fimmtu beygju,“ sagði Russell.

„En ef við berum það saman við það þegar við prófuðum dekkin í upphafi árs á Jerez-brautinni þar sem brautarhiti var í kringum 10 gráður. Þar var þetta ótrúlega erfitt.“

„Ef ég á að vera hreinskilinn þá held ég að íþróttin sé ekki tilbúin í að nota þessi dekk í keppni. Ég myndi allavega hafa miklar áhyggjur af þeim sem vinna á þjónustusvæðinu þegar bílar koma inn í þjónustuhlé. Ég myndi hafa miklar áhyggjur af upphitunarhringnum við kaldar aðstæður. Það verða árekstrar, ég efast ekki um það,“ bætti Russell við.