Kanna hvort Rússum hafi tekist að skemma loftvarnarkerfi

Umfangsmikil loftárás var gerð á Kænugarð í nótt. Úkraínumenn greindu frá því að loftvarnarkerfi þeirra hafi skotið niður allar flaugar Rússa. CNN greinir nú frá því að svokallað Patriot-loftvarnarkerfi Úkraínumanna hafi eyðilagst, eða orðið fyrir skemmdum, í árásinni.

Um er að ræða háþróað kerfi sem er sagt sérstaklega skilvirkt við það að skjóta niður stýri- og eldflaugar.

Sjá einnig: Send­a best­a loft­varn­ar­kerf­ið til Úkra­ín­u

Rússneska varnarmálaráðuneytið greindi frá því í dag á Telegram að tekist hafi að koma höggi á loftvarnarkerfið. Úkraínski herinn vildi ekki tjá sig um þessar yfirlýsingar Rússa þegar eftir því var leitað, að því er fram kemur í umfjöllun CNN.

„Við getum ekki tjáð okkur um það. Við forðumst það að tjá okkur um rússneskar heimildir,“ segir talsmaður úkraínska flughersins, Serhiy Ihnait.

Eins og áður segir búa Úkraínumenn nú yfir tveimur Patriot-kerfum. Rússar hafa áður beint skotum sínum að kerfunum en þær tilraunir hafa mistekist. Embættismenn í Bandaríkjunum telja að Rússum hafi tekist að greina merki frá kerfunum og þannig staðsett þau nákvæmlega.