Helvítis kokkurinn: Lasagne þrútið af ást með baguette og hvítlaukssmjöri

Aníta Guðlaug Axelsdóttir skrifar 26. apríl 2023 07:01

Allir ættu að prufa að elda þetta Lasagne. Vísir/Ívar Fannar

Ívar Örn Hansen eða Helvítis kokkurinn eins og hann er betur þekktur, heldur áfram að kenna okkur á lífið í eldhúsinu, í þetta skiptið er það vinsæli heimilismaturinn Lasagne sem mætti kalla hina fullkomnu miðvikudagsmáltíð.

Klippa: Helvítis kokkurinn - Lasagne

Lasagne fyrir 10 manns

1 kg nauta og grísahakk frá Kjarnafæði
3 sneiðar beikon
Ólífuolía
2 gulrætur
2 laukar
3 stangir sellerí
300 ml hvítvín
1 l nautasoð
1 rauður chilli
6 hvítlauksrif
100 gr tómatpaste
2 búnt steinselja
Salt
Pipar
200 gr smjör
500 ml mjólk
4 eggjarauður
500 gr kotasæla
1 stk 12 mánaða Gouda
2 pokar 4ja ostablanda frá MS
100 gr parmesan ostur
1 pakki lasagne blöð
100 gr parmesan á toppinn
10 skvettur af hot sauce af eigin vali

Aðferð:

Saxið beikon og steikið í 10-15 mínútur í stórum potti ásamt hakkinu. Kryddið með salti og pipar.

Saxið lauk, gulrætur, sellerí, chilli og hvítlauk og steikið í ólífuolíu í öðrum potti í 10 mínútur á meðalhita. Kryddið með salti og pipar. Blandið tómatmauki út í og steikið í um 3-5 mínútur. Hellið blöndunni út í pottinn með kjötinu.

Hellið hvítvíni út í pott og sjóðið í 10 - 15 mín. Hellið kjötsoði út í pott og sjóðið í 30- 40 mín. Hellið mjólk út í pott og sjóðið í 20 mín um það bil. Saxið eitt búnt steinselju og setjið út í pottinn ásamt smjörinu og parmesan ostinum. Sjóðið í 2-3 mín. Blandið eggjarauðum út í, eina í einu.

Raðið öllu saman samkvæmt myndbandi. Ólífuolía í botninn á fatinu og svo í eftirfarandi röð:

Lasagne blöð - sósa - Gouda ostur - lasagne blöð - sósa - 1 búnt steinsselja saxað - kotasæla - lasagne blöð - sósa - 4ra osta blanda - lasagne blöð - sósa - ostur - parmesan ostur.

Bakið í ofni undir álpappír við 150° í 60 mínútur. Takið álpappír af og bakið í 10 mínútur á 220°, hvílið lasagne í 30 mínútur og njótið.

Hvítlaukssmjör fyrir baguette:

200 gr olífuolía
14 hvítlauksrif
Svartur pipar
20 gr graslaukur
300 gr mjúkt smjör

Aðferð:

Hellið olíu í eldfast mót og setjið hvítlauk út í. Bakið hvítlauk í 15 mínútur á 200° í ofni. Kreistið hvítlaukinn út í smjörið og hendið hýðinu. Saxið graslauk og blandið við smjörið ásamt svörtum pipar við hæfi. Skerið heilt baguette í sneiðar og smyrjið að vild.

Salat að eigin vali er fínt með, þið ráðið.

Það er engin regla yfir hversu mikið af parmesan osti þú vilt setja yfir.Vísir/Ívar Fannar

Ívar Örn Hansen er Helvítis kokkurinn sem kennir ykkur að elda bragðgóðan mat á mannamáli á Vísi og á Stöð 2+. Matreiðsluþátturinn er fyrir þá sem vilja ekkert kjaftæði, bara elda bragðgóðan mat og koma þeir inn vikulega.

Hægt er að sjá alla þættina hér á Vísi.

Matur Uppskriftir Helvítis kokkurinn