„Fólk gerir mis­tök en mis­tök trekk í trekk eru ekki boð­leg“

„Klárlega var þetta svolítið dropinn sem fyllti mælinn. Að boða okkur í tökur á þeim degi sem við erum að spila Meistarar meistaranna. Það er í raun fyrsti leikur í móti, eins og við horfum á það. Það var klárlega dropinn sem fyllti mælinn en það voru atvik vikum áður sem voru líka eitthvað sem við vorum ekki hressar með en þarna fannst okkur við þurfa að standa í lappirnar og koma okkar á framfæri.“

Átti að vera auglýsing fyrir báðar deildir

„Fyrst og fremst þessi auglýsing. Að hún hafi komist í gegn án þess að nokkur hafi sett spurningamerki við. Frábær auglýsing, ætla ekki að setja út á það en að kvenmenn hafi ekki verið framar þar í flokki voru vonbrigði. Þetta átti að vera auglýsing fyrir báðar deildir. Þegar ég horfði á auglýsinguna í fyrsta skipti hélt ég að þetta væri bara fyrir Bestu deild karla og var þá að bíða eftir kvenna auglýsingunni. Svo var víst ekki,“ sagði Elísa aðspurð hvað það var í aðdragandanum sem þær voru ekki sáttar með.

„Svo auðvitað þessi Fantasy-deild. Við erum alltaf að reyna ryðja veginn fyrir komandi kynslóðir. Þetta er ofboðslega mikilvægt skref í þessari kvenréttindabaráttu og til að lyfta kvennaboltanum á næsta stig. Fyrir mér snýst þetta ekki um peninga, snýst um að lyfta fyrirmyndum upp og gera þær sýnilegar. Þannig erum við að búa til betri knattspyrnukonur fyrir framtíðina.“

Þetta skiptir sköpum

„Mér finnst þetta alvarlegt upp á það að gera að við erum ekki að lyfta kvenfyrirmyndum nægilega mikið upp. Við erum ekki eins sýnilegar fyrir litlu stelpunum okkar. Þetta skiptir sköpum þegar við erum að reyna fara í þróun með það að koma kvennaboltanum lengra eða á hærri stall. Þetta er allt klárlega partur af því. Mín skoðun er sú að mér finnst þetta ekki boðlegt, erum klárlega að taka skref aftur á bak.“

„Erum búin að vera taka framfaraskref frá því ég byrjaði í meistaraflokki, þau hafa verið svakalega stór og hröð. Mér finnst þetta skref aftur á bak og vonandi verður þessi umræða til þess að þetta mun ekki koma fyrir aftur. Fólk gerir mistök en mistök trekk í trekk eru ekki boðleg svo við viljum sjá ÍTF gera betur.“

„Fyrst og fremst vonbrigði kannski. Finnst ekki smekklegt hjá Þóri að koma svona fram. Hann á að vita betur og ég held að hann viti alveg betur,“ sagði Elísa aðspurð út í ummæli Þóris Hákonarsonar, fyrrverandi framkvæmdastjóra Knattspyrnusambands Íslands, og starfsmanns ÍTF.

„Ég vildi óska þess að svarið væri nei. Ég held að það sé enginn að smána kvennaboltann, held það sé ekki grunnurinn að þessu. Held að þetta sé fyrst og fremst hugsunarleysi. Maður vill ekki að kyn skipti máli þegar kemur að svona baráttu eða lyfta báðum deildum til jafns. Kannski þurfum við að fá inn einhvern sem hefur virkilega brennandi áhuga á kvennabolta. Það er fullt af fólki þarna úti sem hefur áhuga, hvort sem það eru konur eða karlar. Það væri kannski byrjunin,“ sagði Elísa um kynjaskiptingu starfsmanna ÍTF og hvort það hefði áhrif.“

Að endingu var Elísa spurð hvernig hún væri stemmd fyrir komandi tímabili. Svarið við því sem og viðtalið í heild sinni má sjá í spilaranum ofar í fréttinni.