Ungur strákur skipti á giftingarhring fyrir Pokémon

„Það eru fáránlega margir búnir að hringja og senda skilaboð,“ segir Páll Ágúst Ólafsson, faðir drengsins, í samtali við Vísi. Páll segir að líklega hafi um fimmtíu manns haft samband.

„Ég hefði ekki trúað því að svo margir hefðu týnt giftingarhring,“ segir Páll. Sonur hans þekkir ekki drenginn sem lét hann fá hringinn og því ákvað Páll að leita til internetsins til að finna eiganda hringsins.

Í færslu sem Páll birti í Vesturbæjarsíðunni á Facebook í gær segir hann að í hringum sé skammstöfun sem eigandinn viti líklegast hver sé og að líklega sé um karlmannshring að ræða.

„Ég efast ekki um að það er einhver þarna úti sem saknar hans mjög mikið og því vona ég innilega að internetið leysi þetta fyrir okkur,“ skrifaði Páll Ágúst.