Fjórði garðurinn hefði af­stýrt hörmungunum

Rætt var við Jón Björn Hákonarson, bæjarstjóra Fjarðabyggðar, í beinni útsendingu í kvöldfréttum Stöðvar 2 í kvöld. Jón benti þar á að ennþá er hættuástand á svæðinu.  

„Ég er hræddur um að það verði ekki afléttingar á næstunni miðað við veðurspána.“

Jón áætlar að töluverður fjöldi, um 370 manns, hafi þurft að yfirgefa heimili sín í gær. Búið er að aflétta rýmingu á hluta þeirra húsa sem rýmd voru í gær þannig hluti íbúa á svæðinu hafa komist heim aftur. 

„Engu að síður verða töluvert margir sem verða hjá vinum og ættingjum. Það er kannski það sem hlýnar manni mest um hjartarætur, það er að finna samstöðuna hér og samstöðuna um allt land. Allar þessar góðu kveðjur sem við erum óendanlega þakklát fyrir og öll þess aðstoð.“

Snjóflóðavarnagarðar spiluðu stórt hlutverk í snjóflóðunum í gær. Eitt þeirra flóða sem féll hefði lent á húsi ef ekki væri fyrir varnargarðana. „Þannig það var nú mikil mildi og manni hlýnar innra með að sjá þessar varnir virka,“ segir Jón sem vekur athygli á því að reisa á annan varnargarð þar sem eitt flóðanna féll í gær. 

„Hér á þessu svæði og út með á fjórði garðurinn að koma, hann hefði náttúrulega afstýrt þessu.“

Lítið magn af snjó en hraðinn óskaplegur

Tómas Zoëga snjóflóðaeftirlitsmaður segir í samtali við fréttamann fyrir austan að ekki hafi verið mikið magn af snjó í því flóði sem féll á hús við Starmýri í Neskaupstað. Skelfilegt er að sjá bílana og húsið sem það flóð skall á.

„Það var voða lítið magn í því en hraðinn hefur verið óskaplegur og farið illa með þetta.“

Tómas tekur svo í svipaða strengi og bæjarstjórinn, bendir á ágæti varnargarðanna: 

„Það hefur verið mikill asi á þessu en það fór nú flóð hér úr fleiri giljum. Eitt úr Bakkagili sem er hérna utan við, það fór nú hérna niður á veðurstöðina okkar, skemmdi fyrir okkur stöðuna. En svo er annað flóð sem fer hér og sannar ágæti garðanna. Það kemur á garðinn og fer alveg upp á topp á því. Það hefði sennilega farið niður á hús ef það hefði ekki verið stoppað.“

Tómas segist ekki telja að hættan sé jafn mikil núna og hún var. Þó þurfi ekki mikið til svo að snjóflóð eigi sér stað: „Það þarf ekki nema snjó og brekku til þess að snjóflóð falli. Því meira af honum, því meiri líkur á því.“

Beið í röð með mat og veiðarfæri

Þá var einnig rætt við ökumenn sem voru að bíða eftir því að leiðin um Fagradal, milli Egilsstaða og Reyðarfjarðar, væri opnuð.  Meðal þeirra var forstjóri Alcoa-Fjarðaáls, Einar Þorsteinsson, en mikill fjöldi starfsmanna álversins þarf að aka daglega um Fagradal til og frá vinnu. Leiðin er ein helsta samgönguæð Austurlands og var því talsverð röð af bílum sem biðu eftir opnuninni.

Óli Heiðar Árnason, vörubílstjóri hjá Austfjarðaflutningum, var einn þeirra sem beið í röðinni og var hann með mat og veiðarfæri í sendiferðabílnum sínum. Hann sagðist þó ekki vita hvort það væri þegar orðinn skortur á því á svæðinu sem var lokað fyrir.