Birt­u mynd­band af lög­regl­u­þjón­um fell­a á­rás­ar­mann­inn

Skömmu eftir að útkallið barst fóru fimm lögregluþjónar inn í skólann og eltu Hale uppi. Það tók þá um tvær mínútur, frá því þeir fóru inn í skólann, að finna Hale og fella hann.

Tilkynning um árásina barst klukkan 10:13 að staðartíma og lögreglan segir að Hale hafi verið felldur um klukkan 10:27.

Myndbandið sem birt var í dag er tekið úr vestismyndavél lögregluþjónsins Rex Engelbert sem hefur starfað í lögreglunni í Nashville í fjögur ár. Hann er einn af áðurnefndum fimm lögregluþjónum sem fóru inn í skólann.

Engelbert var vopnaður riffli en í upphafi fóru lögregluþjónarnir á milli kennslustofa og tryggðu þær. Það var þar til skothljóð heyrðust en þá hlupu þeir í átt að skothríðinni þar sem þeir komu að Hale og skutu hann til bana.

Vert er að vara lesendur við því að myndbandið getur vakið óhug.

Lögreglan hefur verið margsaga um Hale frá því árásin átti sér stað. Fyrst var hann sagður 28 ára gömul kona og síðar meir var hann sagður transmaður. Það var þó dregið til baka. AP fréttaveitan hefur svo eftir lögreglunni að Hale hafi fæðst kvenkyns en notast við karlkyns fornöfn.

Hale var með tvo hálfsjálfvirka riffla og skammbyssu þegar hann var felldur og er talið að hann hafi ætlað að ráðast á fleiri staði á eftir skólanum, þar sem hann var nemandi á árum áður.

Fórnarlömb Hale voru þau Evelyn Dieckhaus, Hallie Scruggs og William Kinney, sem voru níu ára. Auk þeirra dóu þau Cyntia Peak (61), Katherine Koonce (60) og Mike Hill (61). Koons var skólastjóri, Peak var afleysingakennari og Hill var húsvörður.

Tilefni árásarinnar liggur ekki fyrir einnig er ekki vitað hvort Hale hafi verið með einhver ákveðin skotmörk eða ekki, samkvæmt AP.