31 sótti um starf verk­efna­stjóra al­þjóða­mála

Þetta kemur fram í skriflegum svörum forsætisráðuneytisins við fyrirspurn fréttastofu.

Greint var frá því í gær að Rósa Björk Brynjólfsdóttir, varaþingmaður Samfylkingarinnar, hefði verið ráðin í starfið en það var auglýst tvisvar og kröfum til umsækjenda breytt í millitíðinni.

Í svörunum segir að í fyrri auglýsingunni um starfið, sem birtist í nóvember í fyrra, hafi ekki verið notast við réttar hæfniskröfur miðað við eðli og umfang starfsins. „Var þar einfaldlega um mistök að ræða,“ segir í svörunum.

Þá segir að þegar auglýsingin var dregin til baka í desember, hefðu níu þegar verið búnir að sækja um. 

Í fyrri auglýsingu var meðal annars gerð krafa um meistarapróf og haldgóða þekkingu á Evrópumálum.

Starfið var auglýst aftur nokkrum dögum síðar, þar sem dregið hafði úr kröfunum.