Á­skor­enda­mótið í beinni: Þrjú lið tryggja sér sæti á Stór­meistara­mótinu

Dusty og FH tryggðu sér fyrstu tvö lausu sætin á Stórmeistaramótinu síðastliðinn þriðjudag og í kvöld bætast þrjú lið til viðbótar við.

Sýnt verður frá Áskorendamótinu í beinni útsendingu á Stöð 2 eSport og hér á Vísi, en það verður viðureign ÍBV og Breiðabliks sem sýnd verður í beinni útsendingu í spilaranum hér fyrir neðan.

Áskorendamótið, eða Áskorendastig Stórmeistaramótsins, er sett upp í svokallað „swiss-format“ þar sem sextán lið hefja keppni og vinna þarf þrjá leiki til að tryggja sér sæti á Stórmeistaramótinu sjálfu. Liðin falla þó ekki úr leik þó þau tapi einum leik, heldur þarf að tapa þremur viðureignum til að falla úr leik. Myndin hér fyrir neðan útskýrir fyrirkomulagið ágætlega.

Nú er mótið komið á það stig að öll liðin hafa leikið þrjá leiki. Þrjú lið munu því vinna sér inn sæti á Stórmeistaramótinu í kvöld og þrjú lið munu falla úr leik.

Eins og áður segir verður viðureign ÍBV og Breiðabliks í beinni útsendingu á Stöð 2 eSport og hér á Vísi í spilaranum hér fyrir neðan, en hægt er að fylgjast með hinum viðureignum kvöldsins á Twitch-hliðarrásum Rafíþróttasamtakana með því að smella á þær fyrir neðan spilarann.