Það voru þó gestirnir í Ystad sem byrjuðu betur og liðið náði fjögurra marka forskoti strax í upphafi leiks í stöðunni 2-6. Heimamenn skoruðu þó næstu fimm mörk og hrifsuðu forystuna til sín, en aftur snéru liðsmenn Ystad leiknum sér í hag og staðan í hálfleik var 12-13, gestunum í vil.
Nokkuð jafnræði var með liðunum framan af í síðari hálfleik, en þegar um stundarfjórðungur var eftir af leiknum stigu heimamenn á bensíngjöfina og náðu upp fimm marka forskoti. Gestirnir voru aldrei nálægt því að ógna þeirri forystu og niðurstaðan varð sjö marka sigur Flensburg, 30-23.
Teitur skoraði eitt mark fyrir Flensburg í kvöld, en eins og áður segir tryggði liðið sér efsta sæti B-riðils með sigrinum. Liðið er með 16 stig þegar ein umferð er eftir, fimm stigum meira en Ystad sem situr í öðru sæti.
Valsmenn koma svo þar á eftir með sjö stig, en liðið mætir franska liðinu PAUC í kvöld í eiginlegum úrslitaleik um sæti í 16-liða úrslitum Evrópudeildarinnar.
DA IST DER GRUPPENSIEG 🎉🔥 #OhneGrenzen #ehfel pic.twitter.com/1xXryMfoEQ
— SG Flensburg-Handewitt (@SGFleHa) February 21, 2023
Þá var Óðinn Þór Ríkharðsson markahæsti maður Kadetten Schaffhausen með átta mörk er liðið vann dramatískan eins marks sigur gegn Benfica í A-riðli, 27-28. Óðinn og félagar höfðu þegar tryggt sér sæti í 16-liða úrslitum, en Benfica þarf að fá í það minnsta eitt stig úr lokaleik sínum til að komast áfram.