Ríflega 40 prósent sjóða og stofnana hafa ekki skilað ársreikningi

Frá þessu greinir Ríkisendurskoðun sem birt hefur útdrátt úr ársreikningum sjálfseignarstofnana og sjóða sem starfa samkvæmt staðfestri skipulagsskrá. 

Alls bar 693 sjóðum og stofnunum að skila ársreikningi fyrir árið 2021 en aðeins 403 eða um 58 prósent höfðu uppfyllt þessa skyldu í desember 2022, tæpum sex mánuðum eftir eindaga skila. 42 sjóðir hafa aldrei skilað ársreikningi þrátt fyrir ítrekanir árlega. 

Hætta á að stofnanir eða sjóðir séu notaðar til að þvætta pening

Í tilkynningu frá Ríkisendurskoðun er vísað til áhættumats Ríkislögreglustjóra vegna peningaþvættis og fjármögnun hryðjuverka frá því í mars 2021 þar sem fjallað var um sjóði og stofnanir og ófullnægjandi skil á ársreikningum. 

Áhætta af því að slíkar stofnanir eða sjóðir séu notaðar til að þvætta ólögmætan ávinning var þar metin veruleg.

„Að mati Ríkisendurskoðunar er mikilvægt að brugðist verði við sem allra fyrst og allra leiða leitað til að bæta skil ársreikninga þessara aðila. Á undanförnum árum hefur Ríkisendurskoðun margoft bent stjórnvöldum á að virkari lagaúrræði þurfi til að knýja fram skil á þessum ársreikningum án þess að brugðist hafi verið við þeim ábendingum,“ segir í tilkynningunni.

Starfandi frá því fyrir aldamót en aldrei skilað ársreikningi

Meðal þeirra sjóða sem hafa aldrei skilað ársreikningi hafa þrír sjóðir eða stofnanir verið starfandi frá því fyrir aldamót, það eru Minningarsjóður Heiðar Baldursdóttur, Styrktarsjóður Icelandic Children Aid (ICA) og Sjálfseignarstofnunin Skógar. Þá hefur Sjómannaþjónustan í Reykjavík og nágrenni verið starfandi frá árinu 2000 en aldrei skilað reikningi.

Fleiri minningarsjóðir eru á listanum og styrktarsjóðir, til að mynda Styrktarsjóður gigtveikra barna sem hefur verið starfandi frá 2014 og Styrktar- og fræðslusjóður um Downs heilkenni sem hefur verið stafandi frá 2019. 

Þá hefur til að mynda Icelandic Wildlife Fund verið starfandi frá 2017 en aldrei skilað ársreikningi líkt og Stofnun Ólafs Ragnars Grímssonar og Sviðslistamiðstöðvar sem hafa verið starfandi frá 2021. 

Sex hafa ekki skilað ársreikningi síðan fyrir 1990, þar á meðal Bókasjóður forsætisembættisins að Bessastöðum sem hefur verið starfandi frá árinu 1969 og Samtök gegn kynferðislegu ofbeldi sem hafa verið starfandi frá 1987. 

Útdrátt Ríkisendurskoðun, sem inniheldur meðal annars lista yfir þá sem hafa ekki skilað ársreikningi, má finna hér.