Nokkrir dómarar á HM í handbolta bendlaðir við veðmálasvindl

Þetta kemur fram í frétt sem TV2 birtir í dag.  

Á meðal þeirra dómara sem hafa verið bendlaðir við veðmálasvindl eru króatíska dómaraparið Matija Gubica og Boris Milosevic sem sáu um dómgæsluna í leik Þýskalands og Katar á heimsmeistaramótinu á föstudagskvöldið síðastliðið. Þeir eru taldir í fremstu röð sem dómarar í handboltaheiminum í dag.  

En á sama tíma ber nafn þeirra á góma í skýrslu Sportradar sem gerð árið 2018. Sportradar er fyrirtæki sem sérhæfir sig í því að greina hvort rökstuddur grunur geti verið um veðmálasvindl í íþróttaleikjum. Fyrirtækið starfar sem dæmi fyrir fyrir evrópska knattspyrnusambandið, UEFA, og samtök evrópskra knattspyrnusambanda. 

Fram kemur í skýrslunnni sem haldið er leynilegri enn sem komið en TV2 komst á snoðir og hefur undir höndum um að grunur sé um að Króatarnir hafi tekið þátt í að hagræða úrslitum í sjö leikjum í Evrópukeppnum félagsliða sem þeir dæmdu. 

Allt í allt hefur Sportradar flaggað 26 leiki á tímabilinu september árið 2016 til nóvember árið 2017 þar sem greinendur telja að maðkur hafi verið í mysunni. Um er að ræða til að mynda leiki í Meistaradeild Evrópu og landsleiki. 

Chris Kronow Rasmussen, sérfræðingur í málefnum tengdum hagræðingum úrslita, segir sjaldgæft að Sportradar sendi frá sér skýrslu þar sem fram koma jafn mörg og augljós dæmi um rökstuddur grunur er um hagræðingu úrslita. 

Rasmussen segir einsýnt að evrópska handboltasambandið, EHF, verði að grípa til aðgerða vegna skýrslu Sportsradar. Sú staðreynd að dómarar, sem dæmdu leiki, sem flaggaðir séu í skýrslunni bendi hins vegar ekki til þess að EHF ætli að taka málið föstum tökum. 

Makedónska dómaraparið Gjorgij Nachevski og Slave Nikolov, sem einnig dæma á heimsmeistaramótinu, eru einnig bendlaðir við veðmálasvindli í framangreindri skýrslu. Dómararnir sem um ræðir hafa neitað þeim sökum sem á þá eru bornar en neita annars að tjá sig um málið.