Mudryk að skrifa undir hjá Chelsea

Mudryk hefur spilað vel fyrir Shaktar Donetsk í vetur og í Meistaradeild Evrópu hefur hann skorað þrjú mörk og gefið tvær stoðsendingar í sex leikjum.

Síðustu vikur hafa fjölmargar fréttir birst þess efnis að Mudryk sé á leið til Arsenal en nú virðist sem nágrannar þeirra í Chelsea séu að stela Mudryk beint fyrir framan nefið á Skyttunum.

Shaktar greinir frá því á Twitter síðu sinni að forseti félagsins, Rinat Akhmetov, og meðeigandi Chelsea, Behdad Eghbali, hafi rætt félagaskiptin í dag og séu mjög nálægt því að semja um kaupverð.

Á samfélagsmiðlum er greint frá því að kaupverðið sé nálægt 100 milljónum evra og þá segir blaðamaðurinn Fabrizio Romano að stjórn Chelsea sé stödd í Póllandi að reyna að ná munnlegu samkomulagi við Mudryk.