Guardiola með fáránlegar hugmyndir um hvernig eigi að vinna United

Fjórum stigum munar á City og United í ensku úrvalsdeildinni en þau eigast við á Old Trafford á laugardaginn. 

Síðan United steinlá fyrir City, 6-3, í október hefur liðinu gengið vel og aðeins tapað einum leik. Guardiola er því meðvitaður um ógnina sem stafar af United-liðinu og uppstilling hans í leiknum gegn Southampton í enska deildabikarnum í kvöld gæti tekið mið af stórleiknum á laugardaginn.

„Ég myndi vilja koma í leikinn gegn United með álagið á leikmenn nokkuð svipað því ég er með nokkrar fáránlegar hugmyndir gegn United,“ sagði Guardiola.

„Ég er ekki búinn að ákveða byrjunarliðið gegn United. Ég hef ekki horft á síðustu leiki þeirra. Ég verð að sjá hvernig þeir spila á heimavelli og hvort þeir breyti einhverju.“

Guardiola hefur sautján sinnum mætt United síðan hann tók við City 2016. City-menn hafa unnið níu leiki, United-menn sex og tvisvar sinnum hefur orðið jafntefli.