Hraunaði yfir dómara og var rekinn út af á eigin góðgerðamóti

Podolski er ættaður frá Póllandi og leikur með Górnik Zabrze þar í landi. Hann tók þátt með því liði ásamt fimm öðrum á innanhúsfótboltamóti um helgina. Podolski skipulagði mótið en allur ágóði af því rann til góðs málefnis.

Mikill hiti var í undanúrslitaleik liðs hans Zabrze við Rot-Weiss Essen frá Þýskalandi. Mikið var um brot og þrjú víti voru dæmd í leiknum, sem þóttu vera vegna misgáfulegra dóma.

Podolski var á meðal þeirra ósáttustu eftir að vítaspyrna var dæmd á hann. Hann óð í dómarann og jós yfir hann fúkyrðum. Að launum fékk hann að líta rautt spjald og ekki rann honum reiðin við það.

Eftir að hann hafði vikið af velli fleygði Podolski vatnsflösku í átt að dómurum leiksins.

Manni færri og án þýsku stjörnunnar tapaði Zabeze leiknum og lék um þriðja sætið hvar sigur vannst á Kaan Marienborn. Essen vann svo úrslitaleikinn 8-3 gegn Blau-Weiss Löhne.

Podolski er 37 ára gamall og vakt fyrst athygli með liði Kölnar í Þýskalandi. Hann var valinn besti ungi leikmaðurinn á HM 2006 og var fastamaður í landsliðinu í 13 ár, frá 2004 til 2017. Hann varð heimsmeistari með Þjóðverjum árið 2014 og hlaut brons á mótunum 2006 og 2010.

Hann hefur leikið með Bayern Munchen, Arsenal, Inter Milan, Galatasaray, Vissel Kobe og Antalyaspor auk Köln og Górnik Zabrze á ferlinum.