Tvær víta­spyrnur fóru for­görðum en samt komst Rúnar Alex á­fram

Gestirnir í Eyupspor komust yfir snemma í fyrri hálfleik en þeir sitja á toppi B-deildarinnar í Tyrklandi á meðan Rúnar Alex og félagar eru í 9. sæti efstu deildar. Á 54. mínútu fengu heimamenn vítaspyrnu en Koka tókst ekki að setja boltann í netið.

Zinedine Ferhat jafnaði metin á 62. mínútu og tæpum stundarfjórðung síðar fékk Koka tækifæri til að koma heimaliðinu yfir. Aftur brenndi hann af og staðan því enn 1-1. Hann kom boltanum loks í netið þegar níu mínútur voru til leiksloka og virtist sem Alanyaspor væri komið áfram.

Taskin Ilter jafnaði hins vegar metin fyrir gestina örskömmu síðar og staðan 2-2 þegar flautað var til leiksloka. Það var svo Idrissa Doumbia sem skoraði það sem reyndist sigurmarkið á 113. mínútu leiksins og fór það svo að Alanyaspor vann 3-2 sigur.

Rúnar Alex, sem er á láni frá Arsenal, og liðsfélagar hans í Alanyaspor því komnir áfram í bikarnum.