Rauk í Gunnar þegar hann sló í auglýsingaskilti

Afturelding vann leikinn, 26-29, og eins og venjulega stýrði Gunnar fagnaðarlátum Mosfellinga eftir leikinn. Hann hefur það til siðs að slá taktinn í auglýsingaskilti en þegar hann ætlaði að gera það í TM-höll þeirra Stjörnumanna í gær var hann stöðvaður af Sigurði.

„Ég ber að­eins í LED skilti í eigu Stjörnunnar sem er fyrir aftan mig og sparka ör­lítið í það og þá fæ ég, að ég tel, fyrr­verandi lands­liðs­mann Sigurð Bjarna­son á mig og hann tekur á­gæt­lega á kallinum,“ sagði Gunnar í samtali við Fréttablaðið í dag. Gunnar benti þó á að venjulega séu auglýsingaskiltin sem hann lemur í annars konar en í Garðabænum.

„Hann hefur haft á­hyggjur af skiltunum sínum. Sigurður hefur sjálfur farið í gegnum nokkra hand­bolta­leiki og væntan­lega tapað nokkrum þannig ég efast um að hann hafi reiðst út í fagnaðar­sönginn okkar. Ég vona alla­vegana ekki, þá hefur hann ekki lært mikið.“

Gunnar segir að þeir Sigurður hafi síðan skilið sáttir eftir að hann bað hann afsökunar á að hafa slegið í skiltin.

Myndband af atvikinu má sjá í spilaranum hér fyrir neðan.

Afturelding hefur verið á góðu skriði að undanförnu og unnið sjö af síðustu níu leikjum sínum í Olís-deildinni. Mosfellingar eru í 3. sæti með sextán stig.

Gunnar lét að venju finna fyrir sér í vörninni í leiknum í gær. Hann stal boltanum til að mynda í þrígang.