Yfirvöld gefa Sádum frí til að fagna sigrinum óvænta

Eftir að hafa verið 1-0 undir þegar flautað var til hálfleiks í leik Sádi-Arabíu gegn Argentínu í fyrsta leik dagsins vann liðið afar óvæntan 2-1 sigur. Raunar voru svo fáir sem bjuggust við sigri Sádanna að tölfræðiveitan Gracenote sá sig knúna til að reikna út líkindi sigursins og tilkynna það að þetta væri í raun óvæntasti sigur á HM frá upphafi.

Til að gefa fólkinu í landinu tækifæri til að fagna þessum sigri landsliðsins hafa yfirvöld í Sádi-Arabíu ákveðið að gefa öllum landsmönnum frí frá vinnu á morgun.

„Sú ákvörðun hefur verið tekin að á morgun, miðvikudag, munu allir starfsmenn fá frí frá vinnu, bæði hjá ríkinu og í einkageiranum, ásamt bæði karlkyns og kvenkyns nemendum,“ sagði í yfirlýsingu frá Mohammed bin Salman, krónprins Sádi-Arabíu.