David Beck­ham náði goð­sagna­kenndu Spice Girls augna­bliki á filmu

Þær Mel C, Victoria Beckham, Emma Bunton og Geri Halliwell voru samankomnar um helgina til þess að fagna síðbúnu fimmtugsafmæli Geri eða Ginger Spice. Kryddpían Mel B, eða Scary Spice, var þó fjarri góðu gamni í þetta skiptið.

Það er óhætt að segja að stelpurnar hafi tekið yfir dansgólfið þegar lagið Say You'll Be There var spilað. Þær sungu og dönsuðu með og höfðu greinilega engu gleymt.

„Það var svo dásamlegt að fagna Ginger um helgina en jafnvel enn dásamlegra að ná þessu augnabliki hjá stelpunum. Vinkonur til lífstíðar,“ skrifaði David Beckham, eiginmaður Victoriu, Posh Spice. Tók hann fram að Mel B hafi verið sárt saknað.

Það er óhætt að segja að hljómsveitin Spice Girls hafi verið ein vinsælasta stúlknasveit heims. Þær störfuðu til ársins 2001, en komu þó fram nokkrum sinnum eftir það. Sveitin kom svo saman árið 2019, þá í fyrsta skipti í ellefu ár, og fór á tónleikaferðalag um Bretlandseyjar. Þær voru þó aðeins fjórar, því Victoria ákvað að taka ekki þátt.

„Við verðum að gera þetta aftur“

Hljómsveitin átti svo 25 ára afmæli á síðasta ári og bjuggust þá margir við því að sveitin myndi taka saman á ný og halda afmælistónleika. Svo varð þó ekki, en bæði Baby Spice og Sporty Spice hafa sagt það í viðtölum að það hafi staðið til, en heimsfaraldurinn hafi sett strik í reikninginn.

„Við erum að ræða þetta. Við erum stöðugt að ræða þetta. Það var alltaf ætlunin. Við héldum þessa æðislegu tónleika á Bretlandseyjum fyrir tveimur árum. Það var það besta sem við höfum nokkurn tíman gert. Sköpunarkrafturinn var ótrúlegur og þetta var svo gaman. Við verðum að gera þetta aftur,“ sagði Mel C eða Sporty Spice í viðtali í The Ellen DeGeneres Show í fyrra.

Nú í nóvember kom svo út sérstök afmælisútgáfa af metsöluplötunni Spiceworld. Platan, sem ber heitið Spiceworld 25, inniheldur tíu vinsælustu lög sveitarinnar, ásamt remix útgáfum og áður óútgefnu efni.

Vinna í því að ná Victoriu aftur

Platan kom út á Spotify á föstudaginn síðasta og aðeins þremur dögum seinna birti Beckham myndbandið af stelpunum syngja saman. Myndbandið þótti sérstaklega merkilegt í ljósi þess að þar virtist Victoria njóta þess að syngja með stelpunum. Hún hefur ekki sungið með sveitinni síðan á Ólympíuleikunum árið 2012.

„Við erum að vinna í því að fá Victoriu aftur. Ég get ekki gefið upp neinn nákvæman tíman, en þetta er eitthvað sem okkur langar til að gera. Við erum að reyna koma þessu í kring. Victoria er alltaf höfð með í öllum ákvarðanatökum. Við viljum bara að hún sé hamingjusöm, en það er draumur okkar að ná henni aftur,“ sagði Mel C í viðtali við tímaritið People fyrir ári síðan. Miðað við myndskeiðið af stelpunum er aldrei að vita nema sá draumur gæti ræst.