Ekki er hægt að búast við endanlegum niðurstöðum í kosningunum fyrr en eftir einhverja daga. Þó er líklegt að nokkuð skýr mynd fáist á niðurstöðurnar í nótt.
Reiknar með að skýrri mynd um klukkan fjögur í nótt
Þannig gerir Kevin McCarthy, leiðtogi Repúblikana í fulltrúadeildinni og væntanlegur forseti deildarinnar nái flokkur hans meirihluta, ráð fyrir því að næg mynd ætti að fást á niðurstöðurnar um klukkan ellefu á austurstrandartíma, það er klukkan fjögur í nótt að íslenskum tíma. Reikna má með að fyrstu niðurstöður í einstaka kjördæmum fari að birtast um miðnætti á íslenskum tíma.
Fylgjast má með beinni útsendingu bandarísku sjónvarpstöðvanna ABC, NBC og CBS í þessari frétt. Sjónvarpstöðvarnar í Bandaríkjunum leggja jafnan mikið í þessar útsendingar og munu allar nýjustu tölur og spár verða birt í beinni útsendingu.
Útsending CBS News:
Alls er kosið um öll 435 sæti fulltrúadeildarinnar. Þar hafa Demókratar haft meirihluta með 220 sæti gegn 212 þingsætum Repúblikana. Þrjú sæti eru auð.
Úrslit í þrjátíu kjördæmum munu skipta sköpum
Mesta spennan er í kringum þrjátíu kjördæmum af þessum 435, en þar er svo mjótt á munum að ekki er hægt að spá nákvæmlega fyrir hvernig fer þar. Talið er að þessi þrjátíu sæti muni ráða mestu um það hversu miklum meirihluta Repúblikanar nái í fulltrúadeildinni. Er þar aðallega um að ræða úthverfi í grennd við borgir í Pennsylvaníu, Kaliforníu, Ohio og Norður-Karólínu.
Tölfræðilíkan tölfræðisíðunnar 538 spáir því að Repúblikanar nái 230 sætum gegn 205 sætum demókrata. Það þýðir að 25 sæta munur yrði á flokkunum. Áðurnefndur McCarthy hefur sagt að hann vilji að Repúblikanar nái minnst 20 sæta meirihluta í fulltrúadeildinni svo að þeir geti látið verkin tala.
Útsending ABC News:
Yfirráðum á fulltrúadeildinni fylgir mikið vald yfir fjárútlátum ríkisins og sömuleiðis vald yfir nefndum sem hægt er að nota til að rannsaka menn og málefni.
Meiri spenna fyrir öldungadeildinni
Meira spenna er fyrir öldungadeildarkosningunni þar sem 35 af 100 sætum eru undir. Þar hangir meirihluti Demókrata á oddaatkvæði Kamölu Harris, varaforseta Bandaríkjanna. Samkvæmt spá 538 eru um 59 prósent líkur á sigri Repúblikana. Eru mestar líkur taldar á að skiptingin verði 51-49, Repúblikönum í vil.
Þar er helst horft til Nevada, Arisóna, Georgíu og Pennsylvaníu þar sem talið er að úrslitin geti ráðist.
Þingmenn öldungadeildarinnar staðfesta flestar af embættistilnefningum forseta Bandaríkjanna og eru dómarar í Hæstarétt þar á meðal.
Einnig er kosið um ríkisstjóra í 36 ríkjum Bandaríkjanna auk fjölmargra embætta víðs vegar um Bandaríkin.
Biden svartsýnn á framhaldið nái Repúblikanar völdum
Í kosningum á miðju kjörtímabili missir valdaflokkurinn yfirleitt nokkur þingsæti yfir til keppinautarins og nú gæti það reynst dýrkeypt. Þótt Biden sjálfur sé ekki í framboði nú þegar helmingur er liðinn af kjörtímabili hans eru kosningarnar álitnar ákveðin mælistika á frammistöðu hans í embætti.´
Útsending NBC News:
Sjálfur er hann svartsýnn á næstu tvö ár nái Repúblikanar völdum í báðum deildum þingsins. Líklegt þykir að ef svo verði muni Repúblikanar nýta sér meirihlutann til að gera Biden lífið leitt.
AP fréttaveitan segir að á árum áður hafi blendin ríkisstjórn boðið upp á möguleika á viðræðum og samvinnu milli flokka. Nú séu Repúblikanar hins vegar að bjóða sig fram á þeim grundvelli að stöðva Biden og Demókrata.
