Bað kærustunnar eftir að hann var valinn í HM-hópinn

Eftir að hafa fengið að vita að hann væri í 26 manna hópi Brasilíu sem fer á HM í Katar síðar í mánuðinum fór Pedro á skeljarnar og bað kærustu sinnar. Og til að toppa daginn sagði hún já.

Hinn 25 ára Pedro horfði á beina útsendingu frá valinu á HM-hópnum ásamt fjölskyldu sinni. Eftir að í ljós kom að hann væri á leið til Katar kraup hann fyrir framan kærustu sína og góður dagur varð enn betri.

Eftir erfiða tíma hjá Fiorentina hefur Pedro spilað stórvel og raðað inn mörkum síðan hann gekk í raðir Flamengo í heimalandinu. Á þessu ári hefur hann samtals skorað 29 mörk fyrir Flamengo og átti stóran þátt í að liðið vann Copa Libertadores, Meistaradeild Suður-Ameríku.

Pedro hefur leikið tvo landsleiki fyrir Brasilíu og skorað eitt mark, í vináttulandsleik gegn Túnis í lok september.

Brasilía hefur leik á HM gegn Serbíu 24. nóvember. Fjórum dögum síðar mæta Brassar Svisslendingum og þeir ljúka svo riðlakeppninni gegn Kamerúnum 2. desember.