Heyrist vera al­menn sam­staða um lögin þó fram­kvæmdin sé iðu­lega gagn­rýnd

„Það hafa ekki komið fram margar tillögur um hvernig nákvæmlega við viljum breyta þessum lögum sem mér hefur nú heyrst almennt vera mikil samstaða um. Enda voru þau samþykkt í breiðri samstöðu. En framkvæmdin er iðulega gagnrýnd og það er eitthvað sem við þurfum að skoða,“ segir Katrín.

Þetta sagði Katrín í samtali við fréttamann að loknum ríkisstjórnarfundi í morgun. Á fundinum var rætt um aðgerð lögreglunnar fyrr í vikunni þar sem leit var gerð að 28 hælisleitendum sem vísa átti úr landi með flugvél í gærmorgun. Þrettán úr hópnum fundust ekki og að lokum voru fimmtán sendir til Grikklands. Í hópi þeirra sem var fluttur til Grikklands var fatlaður maður líkt og mikið hefur fjallað um.

Sjá má viðtalið við Katrínu í heild sinni í spilaranum að neðan.

Jón lagði fram nánari upplýsingar um aðgerðina

Katrín segir að Jón Gunnarsson dómsmálaráðherra hafi á ríkisstjórnarfundinum í morgun lagt fram aðeins nánari upplýsingar um umræddan brottflutning – hver voru flutt, hver aðdragandinn hafi verið og fleira. 

„Og ennfremur sérstaklega varðandi málefni þessa fatlaða manns. Það liggur fyrir að við þurfum að skoða það nánar, bæði hvað varðar þessa framkvæmd á flutningi og sömuleiðis samskipti við réttargæslumann.“

Forsætisráðherra segir að hún hafi beðið dómsmálaráðherra að koma með upplýsingarnar á ríkisstjórnarfund í morgun.

„Ég tel mjög mikilvægt að við förum yfir þessa framkvæmd og lærum af þessari framkvæmd. Á meðan við erum með lagaramma sem gerir ráð fyrir að ekki öll sem hingað koma fái jákvætt svar við sínum umleitendum og þar af leiðandi yfirgefi landið, þá þurfum við að tryggja að þessi framkvæmd – sem er flókin og ég vil ítreka það að ég skil mæta vel að verkefni lögreglunnar er flókið – en við þurfum að meta þessa framkvæmd og sjá hvort hægt er að læra af henni,“ segir Katrín.

Útlendingastofnunar að leggja mat á persónulegar aðstæður

Aðspurð hvort það eigi ekki að horfa til persónulegra aðstæðna einstaklinga í þessum málum segir Katrín að það sé einmitt verkefni Útlendingastofnunar og kærunefndar útlendingamála. Það sé þeirra hlutverk að leggja mat á einstaklingsbundnar aðstæður hvers og eins.

„Það er ekki hlutverk stjórnmálamannanna að fara yfir þau mál og leggja mat á þau. Við bjuggum til þetta kerfi til þessa að tryggja það – eins og kemur mjög skýrt fram í lögum um útlendinga frá árinu 2016 – að hver og einn fái réttláta málsmeðferð. Nú liggur það fyrir að málum þessara einstaklinga er lokið á stjórnsýslustigi. Einhver hafa óskað eftir endurupptöku, önnur bíða eftir meðferð dómstóla. Þær beiðnir fresta ekki réttaráhrifum samkvæmt þessum lögum.

Mögulega er nauðsynlegt að breyta lögunum. Það hafa þó ekki komið fram margar tillögur um hvernig nákvæmlega við viljum breyta þessum lögum sem mér hefur nú heyrst almennt vera mikil samstaða um. Enda voru þau samþykkt í breiðri samstöðu. En framkvæmdin er iðulega gagnrýnd og það er eitthvað sem við þurfum að skoða.“