Nóvemberspá Siggu Kling - Bogmaðurinn

Orkan þín er mikil en samt ertu ekki alveg viss í hvað þú ætlar að eyða henni. Það eru miklar sviptingar næstu 60 daga, alveg eins og hjá Íslandi, því að Ísland er Bogmaður. Það borgar sig að segja alltaf satt, því ef maður er með eina lygi munu fleiri fylgja. Taktu til í kringum þig því að allt er að koma í ljós ef þú hefur viljað fela eitthvað. Líka núna þarftu að horfa ofsalega vel í kringum þig og að slaka eins mikið á og þú getur. Áhyggjur af sama stað, vinnu eða því sem þú ert að atast í getur breyst á einu andartaki, en sama þó það verði skipting í lífinu hjá þér lendir þú á betri staðsetningu í lífinu.

Þú átt svo góða að og átt svo mikla blessun inni í karmaorkunni þinni. Ef þú hefur verið að kljást við veikindi vegna álags eða annarra þátta þá mun það hreinsast, því að þú finnur betri leið en þú hefur verið að nota. Nóvember er svo merkilegur fyrir þig, hann er að byggja undistöður fyrir lífið þitt. Svo eins og það getur verið erfitt að horfa á undirstöðurnar og að sjá ekki húsið sem þú ert að fá, þá getum við sagt að þetta er sterkt tímabil til framtíðarinnar. Eftir um það bil 45 daga færðu svo jákvæða sendingu frá Almættinu svo þú finnur að þú verður sáttur.

Það blessar þig gott fjölskyldulíf og mikið traust sem ríkir þar. Það er áberandi maður með einhver völd sem kemur inn í zonið þitt og þú finnur að þú ert miklu sjálfsöruggari vegna þessa tengingar. Ástin er falleg og margir munu spá í að gifta sig, trúlofa sig, byrja saman á samfélagsmiðlum eða að setja blessun yfir fjölskyldulíf, því í því býr galdurinn. Og þann 15. nóvember fer Venus líka yfir í Bogmanninn og þá verður allt léttara og rómantískara.

Knús og kossar, Sigga Kling