Íslendingaliðið úr leik eftir tap á Spáni

Íslendingaliðið FC Kaupmannahöfn er úr leik í Meistaradeild Evrópu, en liðið mátti þola 3-0 tap gegn Sevilla í næst seinustu umferð G-riðils í kvöld.

Fyrir leik kvöldsins átti FCK enn veika von um að vinna sér inn sæti í útsláttarkeppni Meistaradeildarinnar, en liðið var líklega frekar að horfa á þriðja sæti riðilsins sem gefur sæti í útsláttarkeppni Evrópudeildarinnar.

Sevilla og FCK voru jöfn í þriðja og fjórða sæti riðilsins og því var ljóst að mikið var undir í kvöld.

Ísak Bergmann Jóhannesson og Hákon Arnar Haraldsson voru báðir í byrjunarliði FCK, en Orri Óskarsson hóf leik á varamannabekknum og kom inn á þegar um tíu mínútur voru til leiksloka.

Markalaust var þegar flautað var til hálfleiks, en heimamenn í Sevilla tóku forystuna eftir um klukkutíma leik með marki frá Youssef En-Nesyri.

Kaupmannahafnarliðið sótti stíft seinustu mínútur leiksins í leit sinni að jöfnunarmarki, en heimamenn refsuðu grimmt og tvöfölduðu forystu sína á 88. mínút með marki frá Isco áður en Gonzalo Montiel bætti þriðja markinu við á annarri mínútu uppbótartíma.

Davit Khocholava fékk svo að líta beint rautt spjald í liði FCK áður en flautað var til leiksloka og niðurstaðan varð því 3-0 sigur Sevilla sem á því enn góðan möguleika á sæti í 16-liða úrslitum.

Íslendingaliðið FCK er hins vegar úr leik, en liðið situr í fjórða sæti riðilsins með tvö stig, þremur stigum minna en Sevilla þegar einn leikur er eftir.