Seinni bylgjan: Amma Hanna sagði 99,9 prósent líkur á að hún myndi hætta en er enn að spila

Hanna var til viðtals í Kvennakastinu, hlaðvarpi um Olís-deild kvenna, og brot úr viðtalinu var spilað í Seinni bylgjunni í gær.

Þrátt fyrir að vera rétthent hefur Hanna jafnan spilað í hægra horninu. Hún þarf því að vinda upp á líkamann til að koma skotum á markið og ekki er annað hægt að segja en hún sé býsna fær í því enda er Hanna markahæst í sögu efstu deildar á Íslandi.

„Ég hef alltaf verið með góðan stökkkraft og stekk upp á hægri eins og örvhentir gera. Þá næ ég vindunni, svífa og skúra gólfið,“ sagði Hanna.

Hún segir að hraðinn í handboltanum sé mun meiri en þegar hún var yngri og líkamsstykur skipti ekki jafn miklu máli. „Núna eru ekki allir kögglar, fólk er hraðara á fótunum og það er alltaf verið að reyna að hraða leiknum,“ sagði Hanna.

Hún hefur oft leitt hugann að því að hætta en er enn að, 43 ára. „Þegar ég var kannski 36-37 ára tapaði ég úrslitaleik og hugsaði núna er þetta komið gott, ég nenni þessu ekki lengur. Ég var alveg brjáluð,“ sagði Hanna en eftir þennan leik, þar sem Stjarnan tapaði fyrir Fram 2017, sagði hún 99,9 prósent líkur á að hún myndi hætta. En nú, sex árum seinna, er Hanna enn að spila.

Hlusta má á viðtalið við Hönnu í spilaranum hér fyrir ofan. Í spilaranum hér fyrir neðan má svo hlýða á Kvennakastið í heild sinni.