Vilja grípa til laga­setningar til að koma í veg fyrir ráðningar til Kína

Fregnir hafa borist af því að að minnsta kosti 30 Bretar hafi ráðið sig til kínverska hersins, sem ku hafa boðið einstaklingunum afar álitlega ráðningarsamninga.

Yfirvöld á Bretlandseyjum eru sögð uggandi vegna málsins þar sem þau segja ráðningarnar ógn við hagsmuni Bretlands og Vesturlanda. James Heappey, ráðherra heraflans, segir vilja til að breyta lögunum á þann veg að mönnum yrði gefin ein viðvörun áður en þeir yrðu sóttir til saka.

Hann segir yfirvöld hafa sett sig í samband við umrædda einstaklinga og látið það skýrt í ljós að hernaðaryfivöld gerðu þá kröfu að þeir störfuðu ekki með Kínverjum.

Heappey segir Kínverja ógna hagsmunum Breta víðsvegar í heiminum. 

Á sumum sviðum ættu þjóðirnar í samstarfi en það væri ekkert launungarmál að Kínverjar hefðu gert tilraunir til að komast yfir leyndarmál Breta og að ráðningar breskra herflugmanna væru liður í því að greina getu flughersins.

Breska varnarmálaráðuneytið hefur gefið út yfirlýsingu um að það freisti þess nú að koma í veg fyrir að fyrrverandi og núverandi flugmenn ráði sig til Kína. Allir umræddir einstaklingar séu þegar bundnir af lögum um þagnarskyldu en ný lög um þjóðaröryggi muni taka enn harðar á öryggisógnum á borð við þessa.