Aron enn að jafna sig og verður ekki með landsliðinu í kvöld

HSÍ hefur gefið út leikmannahópinn fyrir leik kvöldsins og þar er Aron ekki að finna. Hann hefur verið að glíma við bakmeiðsli og ljóst að hann hefur ekki náð sér af þeim. Hann mun því horfa á leikinn úr stúkunni.

Markvörðurinn Viktor Gísli Hallgrímsson glímir einnig við meiðsli en Ágúst Elí Björgvinsson og Björgvin Páll Gústavsson munu verja mark Íslands í kvöld. Þá er Ómar Ingi Magnússon frá vegna persónulegra ástæðna.

Aron spilar að jafnaði sem vinstri skytta eða leikstjórnandi með íslenska liðinu en Ísland er vel mannað í þeim stöðum þar sem Janus Daði Smárason, Elvar Ásgeirsson, Elvar Örn Jónsson og Gísli Þorgeir Kristjánsson eru í hópnum í kvöld.

Ísland mætir Ísrael klukkan 19:45 að Ásvöllum í Hafnarfirði en uppselt er á leikinn. Um er að ræða fyrsta leik Íslands í undankeppninni en auk Ísraels eru Eistland og Tékkland í riðli Íslands.

Ísland mætir Eistlandi í öðrum leik undankeppninnar ytra á laugardaginn kemur. Næsti gluggi er í mars og svo klárast riðlakeppnin í lok apríl á næsta ári. Tvö efstu liðin fara á EM og þá fara lið með bestan árangur í þriðja sæti einnig á mótið.

Leikmannahópur Íslands gegn Ísrael í kvöld

Markverðir:

Ágúst Elí Björgvinsson, Ribe Esbjerg (45/1)

Björgvin Páll Gústavsson, Valur (242/16)

Aðrir leikmenn:

Arnar Freyr Arnarsson, MT Melsungen (69/80)

Bjarki Már Elísson, Telekom Veszprém (89/276)

Daníel Þór Ingason, Balingen-Weistetten (37/11)

Elliði Snær Viðarsson, Vfl Gummersbach (21/26)

Elvar Ásgeirsson, Ribe Esbjerg (7/15)

Elvar Örn Jónsson, MT Melsungen (52/133)

Gísli Þorgeir Kristjánsson, SC Magdeburg (37/68)

Hákon Daði Styrmisson, Vfl Gummersbach (6/23)

Janus Daði Smárason, Kolstad Håndball (56/82)

Kristján Örn Kristjánsson, Pays d’Aix UC (19/19)

Sigvaldi Björn Guðjónsson Kolstad Håndball (47/115)

Teitur Örn Einarsson, SG Flensburg-Handewitt (29/27)

Viggó Kristjánsson, SC Leipzig (31/70)

Ýmir Örn Gíslason, Die Rhein-Neckar Löwen (62/33)