„Án hjartahnoðs væri ég dauður“

Odenkirk, sem er 59 ára gamall, var við tökur á síðustu seríu Better Call Saul þegar hann fékk hjartaáfall og hneig niður. Hann opnaði sig um atvikið í samtali við Radio Times á dögunum

„Ég féll niður á hné, og síðan hneig ég alveg niður. Ég held að ég hafi sagt „mér líður ekki nógu vel.“ Meðleikarar hans, Rhea Sheehorn, sem fer með hlutverk Kim Wexler og Patrick Fabian, sem fer með hlutverk Howard Hamlin, gripu í Bob og öskruðu á hann að halda sér á þessari jörðu. „Ég dró ekki andann, ef enginn hefði verið þarna, hefðu þau ekki framkvæmt hjartahnoðið, væri ég dauður innan fárra mínútna,“ segir Bob.  

Loks kom læknir tökuliðsins á svæðið og sem framkvæmdi hjartastuð og kom Bob í öruggari hendur.

Komið að leiðarlokum 

Better Call Saul þáttunum lýkur í næstu viku eftir sex spennutrylltar seríur þar sem Bob Odenkirk fer með hlutverk lævísa lögmannsins Saul Goodman sem verður sífellt spilltari með hverju málinu sem hann tekur sér fyrir hendur. Í hvert sinn sem það lítur út fyrir að lögmaðurinn hafi málað sig út í horn finnur hann leið úr aðstæðunum með klækjabrögðum. Í málin blandast deilur fíkniefnabaróna frá Mexíkó sem berjast um yfirráðasvæði í Nýju-Mexíkó.

„Þetta hlutverk á svo stóran þátt í lífi mínu að ég á mjög erfitt með að horfast í augu við það að þessu sé að ljúka.“

„Þetta hafa samtals verið tólf ár en þegar ég mun horfa á síðustu seríuna með öllum hinum mun ég átta mig á því: þetta er búið.“

Kærkomnir endurfundir

Þættirnir gerast að sjálfsögðu á sömu slóðum og Walter White og Jesse Pinkman gerðu garðinn frægan í Breaking Bad þáttunum en Better Call Saul þættirnir eiga sér stað nokkrum árum áður en þeir kynnast á tilviljanakenndan hátt. Í Breaking Bad flækist Saul Goodman í eiturlyfjabrask gagnfræðiskólakennarans Walter White sem verður með tímanum alræmdur eiturlyfjabarón, ásamt ógæfusama kumpána sínum Jesse Pinkman. Tvíeykinu bregður fyrir í þessari síðustu seríu Better Call Saul og segist Odenkirk hafa verið himinlifandi yfir endurfundunum.

„Þetta var bara besta tilfinning allra tíma. Í fyrsta þætti sem við tókum upp fyrir tólf árum vorum við í tökum úti í eyðimörkinni klukkan tvö um nótt í sandstormi. Þannig að fá þessa endurfundi núna... ég get ekki sagt meira en það. Þetta verður magnað.“

Better Call Saul þættirnir eru sýndir á Stöð 2 og Stöð 2+