Við fyrstu sýn er ansi margt að sjá í stiklunni og í senn lítið sem ekki neitt, eins og oft á við með stiklur sem þessa.
Þar bregður þó mörgum persónum fyrir og sömuleiðis mörgum stöðum sem aðdáendur söguheims Tolkiens ættu að kannast við.
Sjá einnig: Kafað í fyrstu stiklu Rings of Power
Hringadróttinssaga gerist á þriðju öld Miðgarðs en þættirnir á annarri öld. Þá voru hringar Saurons og hinir hringarnir smíðaðir og hjarðir orka og drýsla herjuðu á gervallan Miðgarð, þar til álfar og menn frá Númenor tóku höndum saman og mynduðu hið svokallaða síðasta bandalag álfa og manna.
Meðal annars fjalla þættirnir um Galadriel, álfadrottninguna sem Kate Blanchet lék í þríleiknum. Hún er leikin af Morfydd Clark en í upphafi hennar sögu mun hún vera að elta uppi þá sem þjónuðu hinum illa Melkor/Morgoth/Bauglir en fróðir lesendur vita ef til vill að Sauron sjálfur var einn þeirra.
Stikluna má sjá hér að neðan. Rings of Power verða frumsýndir á Prime Video þann 2. september.
Amazon birti í síðasta viku styttri stiklu en þar má sjá oggulítið myndefni sem er ekki sýnilegt í stiklunni hér að ofan.
Hér að neðan förum við lauslega yfir það sem sjá má í nýju stiklunni.
Hún hefst á því að við heyrum rödd segja að Miðgarður hafi einu sinni verið svo ungur að heimurinn hafi ekki enn upplifað sólarupprás. Þrátt fyrir það hafi verið ljós. Það ljós kom frá trjám Valinor, sem bregður fyrir í stikunni.
Þegar hér er að komið kemur hröð runa atriði þar sem sjá má mann á hesti með spjót, dvergaprinsinn Durin fjórða halda á einhverju glansandi, hóp álfa lyfta sverðum, hlekkjaðan Arondir hoppa undan árás stórs úlfs og Galadriel berjast við tröll.
