Það voru breskir fjölmiðlar sem greindu frá andláti Goram rétt fyrir hádegi í dag eftir stutta en erfiða baráttu við krabbamein. Fyrir um mánuði greindi Goram frá því í viðtali að hann ætti eftir hálft ár eftir ólifað eftir að hafa verið greindur með krabbamein í vélinda.
Goram var mörgum kunnur en hann lék 43 sinnum fyrir skoska landsliðið ásamt því að leika með Glasgow Rangers lengst af og á láni hjá Manhcester United á láni tímabilið 2000-2001.
Á tíma sínum með Rangers vann hann skoska meistaratitilinn fimm sinnum og skoska bikarinn þrisvar sinnum. Þá var hann valinn besti leikmaður skosku deildarinnar bæði af leikmönnum og blaðamönnum tímabilið 1992-1993. Það tímabil unnu Rangers titilinn heimafyrir og rétt misstu af því að komast í úrslitaleik Meistaradeildar Evrópu en þeir lentu einu stigi á eftir Marseille í riðli sínum en franska liðið vann titilinn eftir úrslitaleik við AC Milan.
Goram þótti liðtækur í krikket og átti fjóra landsleiki með skoska krikket landsliðinu en hann er eini Skotinn sem státar af því að hafa spilað fyrir landsliðið bæði í fótbolta og krikket. Krikket ferlinum lauk þegar Walter Smith, stjóri Rangers, skipaði honum að hætta í krikkett til að einbeita sér að fótboltanum.