„Forsmekkur af heimi óreiðu og ólgu sem ekkert okkar vill búa í“

Þetta sagði ráðherrann á varnarmálaráðstefnu sem stendur nú yfir í Asíu. Austin fundaði í gær með Wei Fenghe, varnarmálaráðherra Kína.

Austin sagði Bandaríkin standa við „Eitt Kína“ stefnuna svokölluðu sem snýst um að viðhalda óformlegum samskiptum við Taívan. Þá sagði hann að einhliða tilraunir til að breyta stöðu Taívans væru óvelkomnar og óráðlegar. Austin ítrekaði þó að Bandaríkjamenn ætluðu sér ekki að þvinga ráðamenn annarra ríkja Asíu til að taka afstöðu gagnvart Taívan.

Hann líkti tilkalli Kínverja til land- og hafsvæðis í Asíu við innrás Rússa í Úkraínu og sagði málefni eyríkisins hluta af heimslægri baráttu. Austin sagði að Bandaríkjamenn myndu áfram standa gegn auknum umsvifum Kína í Kyrrahafinu og standa með bandamönnum sínum á svæðinu.

Austin sagði það eitt helsta áherslumál Bandaríkjanna, samkvæmt frétt Washington Post.

„Innrás Rússa í Úkraínu er það sem gerist þegar kúgarar traðka á reglunum sem vernda okkur öll,“ hefur AP fréttaveitan eftir Austin. Hann sagði þetta gerast þegar ráðamenn heimsveldis ákveði að græðgi þeirra trompi rétt friðsamra nágranna þeirra.

„Þetta er forsmekkur að heimi óreiðu og ólgu sem ekkert okkar vill búa í.“

Sjá einnig: „Taívan er ekki Úkraína“

Ráðamenn í Kína hafa sagt að ekki sé hægt að bera saman aðstæður Úkraínu og Taívans.

„Óhjákvæmilegt“ að Taívan sameinist Kína

Kínverjar segja Taívan tilheyra Kína en árið 1949 flúðu þjóðernissinna til eyjunnar undan kommúnistum í borgarastyrjöld landsins. Forsvarsmenn Kommúnistaflokksins hafa heitið því að ná völdum í Taívan, með valdi ef nauðsynlegt sé.

Xi Jinping, forseti Kína, hefur sagt það „óhjákvæmilegt“ að Taívan verði hluti af Kína.

Taívanar segjast sjálfstæðir og segjast ætla að verja frelsi þeirra og lýðræði. Sjálfstæðissinnum hefur vaxið ásmegin í Taívan á undanförnum árum en Taívanar hafa aldrei lýst yfir formlegu sjálfstæði.

Kínverjar segja að reyni Taívanar að lýsa yfir sjálstæði eða taka skref í þá átt, muni það leiða til stríðs.

Bandaríkin munu aðstoða

Bandaríkin eru skuldbundin til að koma Taívan til aðstoðar í tilefni innrásar Kína en ráðamenn vestanhafs hafa í gegnum tíðina haldið öllum möguleikum opnum þegar kemur að því í hverju slík aðstoð gæti falist og hvort að Bandaríkin myndu beita herafla sínum.

Á ensku hefur þessi stefna verið kölluð „strategic ambiguity“ sem hægt er að íslenska sem strategíska tvíræðni.

Joe Biden, forseti Bandaríkjanna, sagði í maí að Bandaríkin myndu koma Taívan til aðstoðar í tilefni innrásar.

Verulegur þrýstingur á Taívan

Undanfarin ár hafa þrýstingar aukið verulega þrýstinginn á Taívan. Það hefur meðal annars bæði verið gert með hernaðaraðgerðum, sem ætlað er að draga máttinn úr Taívan til lengdar, og með umfangsmiklum njósnum.

Sjá einnig: Beita óhefðbundnum hernaði gegn Taívan

Seint í fyrra bárust til að mynda fregnir af því að Kínverjar hefðu orðið sér út um útsendara í innsta hring ráðamanna í Taívan og innan hersins.