Leyfði mönnum að jafna sig með ástvinum fyrir kvöldið

Staðan í einvígi FH og Selfoss er 1-1 svo að liðið sem vinnur í kvöld kemst áfram í undanúrslit og mætir þar Val. Selfyssingar unnu í Krikanum í síðustu viku en steinlágu svo á heimavelli.

„Ég held að menn hafi vitað það best sjálfir að við vorum bara lélegir [í leiknum á Selfossi á mánudaginn]. En það er ekki mikill tími á milli leikja. Ég gaf mönnum svolítið frí. Leyfði þeim að taka „recovery“ sjálfir og vera með fjölskyldu og vinum, sínum ástvinum, og svo hittumst við í gær, fórum yfir vídjó og tókum létta æfingu. Við erum klárir fyrir kvöldið, ég er ekki í nokkrum vafa um það,“ segir Halldór en viðtalið við hann má sjá hér að neðan.

„Þegar maður horfir á leiki milli þessara liða á síðustu árum þá hafa þetta verið mjög spennandi leikir og yfirleitt ráðist á síðustu sekúndum. Ég býst alveg við því í kvöld. Ég býst líka við að það verði meiri harka en í síðasta leik,“ segir Halldór sem býst jafnframt við fjölda stuðningsmanna og alvöru úrslitakeppnisstemningu.

Leikurinn verður í beinni og opinni útsendingu hér á Vísi og á sjónvarpsrásinni Stöð 2 Vísi, og hefst hann klukkan 19:30.