Brynja telur Sigurð Inga ekki vera ras­ista: „Við erum mann­leg og við skítum stundum upp á bak“

Vigdís Häsler, framkvæmdastjóri Bændasamtakanna, greindi frá því í færslu á Facebook í gær að ráðherrann hafi látið „afar særandi ummæli“ falla um hana. Ekki hefur fengist staðfest opinberlega hver ummælin voru en hann er sagður hafa vísað til hennar sem „þeirrar svörtu.“

Skömmu síðar viðurkenndi Sigurður Ingi að hann hefði látið „óviðurkvæmileg orð“ falla í hennar garð og baðst afsökunar. Hann vildi ekki tjá sig nánar um málið þegar fréttastofa reyndi að ná tali af honum að loknum ríkisstjórnarfundi í morgun.

„Ég ætla ekki að neita því að þetta er ömurlegt, sárt og glatað. Mér leið illa í allan gærdag, að melta þetta allt saman,“ sagði Brynja Dan í Morgunútvarpinu á Rás 2 í morgun en hún vildi ekki tjá sig frekar um málið þegar fréttastofa leitaði viðbragða og vísaði einfaldlega til viðtalsins í morgun.

Þar greindi hún frá því að Sigurður Ingi hafði hringt í hana vegna málsins. „Hann er fullur iðrunar, ég efast ekki um það í eina sekúndu, og svekktastur út í sjálfan sig,“ sagði Brynja í viðtalinu.

„Það er nú bara þannig að við erum mannleg og við skítum stundum upp á bak og þá finnst mér kannski spurningin hvernig við ætlum að hreinsa upp eftir okkur, bæta okkur og gera betur og horfa fram á við,“ sagði Brynja enn fremur. 

Sjálf er Brynja ættleidd frá Srí Lanka og sagðist hún ekki hafa upplifað fordóma í sínum störfum fyrir Framsóknarflokkinn, heldur hafi henni verið tekið fagnandi.  

„Alls ekki og þvert á móti, mér finnst Sigurður Ingi dásamlegur og hann hefur verið hinum við borðið, að fagna því hvað við erum fjölbreytt og megum vera alls konar. Bara allt öfugt við þetta,“ sagði Brynja.

Fara þurfi varlega í að kalla fólk rasista

Í viðtalinu var sömuleiðis rætt við Kristínu Loftsdóttir, prófessor við Háskóla Íslands, en hún hefur rannsakað kynþáttafordóma á Íslandi um langa hríð. 

„Eitt af því sem að einkenndi umræðuna mjög lengi hér á Íslandi var svona ákveðin afneitun á því að hér væri rasismi,“ sagði Kristín í viðtalinu og vísaði til að mynda til endurútgáfu bókarinnar Negrastrákarnir.

Hún telur umræðuna þó hafa tekið töluverðum breytingum undanfarin ár, þá helst eftir 2020. „Nú finnst mér vera miklu meiri svona tilfinning í samfélaginu um að þetta er óásættanlegt að vera að nota orð og hugtök og rasismi sé eitthvað sem er raunverulegt í íslensku samfélagi,“ sagði Kristín en bætti þó við að enn væri að finna rasisma hér á landi.

„Mér finnst pínu stigsmunur á hvort að fólk segi eitthvað rasískt eða hvort það sé rasisti, mér finnst veldismunur þar á,“ sagði Brynja aftur á móti. „Ég hef sjálf alveg hlegið að einhverjum óviðeigandi bröndurum í gegnum tíðina, og örugglega við öll við þetta borð, en svo erum við bara alltaf að læra.“

„Mér finnst að við þurfum að stíga mjög varlega til jarðar ef við ætlum að fara að kalla fólk rasista því það gefur til kynna einbeittan brotavilja, sem að ég held að hafi ekki verið þarna,“ sagði Brynja enn fremur.

Fréttin hefur verið uppfærð.