Það var klárlega tikkað í ansi mörg box á blindu stefnumóti Birtu Rósar og Skúla sem virtust eiga margt sameiginlegt.
Birta Rós er 26 ára gömul og starfar í dag sem þjónn á veitingastaðnum Fjallkonan í miðbæ Reykjavíkur. Hún segist oft vera kölluð mamman í vinhópnum og lýsir sér sem mjög rólegri týpu sem sé smá „nördi“ inn við beinið.
Skúli er 27 ára reykvíkingur, starfar sem tölvunarfræðingur og veitt fátt betra en rólegheit heima fyrir með kisunum. Hann er stundvís, ábyrgur og dreymir um það að verða pabbi.
Höskuldarviðvörun (e. spoiler alert)
Fyrir þá sem ætla sér að horfa á þáttinn en hafa enn ekki séð hann þá mælum við sterklega með því að hætta að lesa hér.
........
Það virtust fljótt vera einhverjir töfrar yfir stefnumóti Skúla og Birtu og rómantíkin var ekki langt undan eins og sjá má í klippunni hér fyrir neðan.
Samkvæmt nýjustu upplýsingum eru Birta og Skúli þó ekki par þrátt fyrir að hafa náð að heilla hvort annað og áhorfendur á fallegu stefnumóti.
Bæði segjast þau þó hafi verið ánægð með reynsluna og kvöldið og enn í leit að ástinni og ævintýrum.
Fyrsta bliks lagalistar á Spotify
Tónlistin úr þáttunum hefur vakið töluverða athygli og nú verður hægt að nálgast lögin úr hverjum þætti inn á Spotify síðu Fyrsta bliksins.
Þeir sem vilja koma sér í réttu stemninguna fyrir kvöldið geta nálgast lagalista úr þætti tvö og eitt hér fyrir neðan.
Lagalistinn úr þætti tvö verður svo aðgengilegur seinna í kvöld.
Mun ástin kvikna í þætti tvö í kvöld?
Í kvöld kukkan 18:55 mun þáttur tvö fara í loftið á Stöð 2 og munu áhorfendur fá að kynnast tveimur nýjum pörum og fylgja þeim á blind stefnumót.
Fyrsta blikið eru stefnumóta- og raunveruleikaþættir sem sýndir eru á Stöð 2. Í hverjum þættir eru kynntir til leiks fjórir einstaklingar sem áhorfendur fá að kynnast í gegnum sófaspjall sem og spjall við aðstandendur. Sýnt er frá spennunni fyrir stefnumótið og auðvitað stefnumótinu sjálfu sem gerist á veitingastaðnum Sjálandi í Garðabæ.
Aðdáendur Fyrsta bliksins geta fylgst með skemmtilegu aukaefni á Instagram síðu þáttarins @fyrstablikid.
Þættirnir eru átta talsins og verða á dagskrá Stöðvar 2 á föstudagskvöldum klukkan 18:55. Í kjölfarið verða allir þættirnir aðgengilegir á Stöð 2+. Hægt er að kaupa áskrift að Stöð 2+ hér.
