Reynir kærir Róbert Wess­man fyrir yfir­hylmingu

„Já, ég er búinn að leggja fram kæru á hendur Róbert Wessmann. Hún snýst um yfirhylmingu og það að hann hafi hvatt til innbrota á skrifstofur Mannlífs,“ segir Reynir.

Stríð Reynis og Róberts er orðið langt og flókið. Reynir hefur gefið það út að hann hyggist gefa út bók um Róbert og umsvif hans. Bókina fjármagnar Halldór Kristmannsson sem var lengi náinn samstarfsmaður Róberts en söðlaði svo um og gaf það út að hann væri uppljóstrari og vildi afhjúpa það sem hann telur vafasama viðskiptahætti Róberts.

Allt það mál tók á sig reifarakennda mynd þegar brotist var inn í bíl Reynis þegar hann var með gönguhóp á Úlfarsfelli. Þaðan var meðal annars stolið lyklum sem notaðir voru til að komast inn á ritstjórnarskrifstofur Mannlífs. Þar var tölvum stolið og unnin spellvirki á vefnum. 

Það mál var til rannsóknar hjá lögreglu en Reynir hafði ætíð grunaðan tiltekin mann sem svo steig fram í viðtali við Reyni sjálfan og sagði sig sekan: Kristjón Kormákur en hann er fyrrverandi samstarfsmaður Reynis. 

Telur einsýnt að Róbert tengist málinu

Í viðtalinu, sem hlýtur að teljast einstakt á heimsvísu, hafnaði Kristjón því að hann hafi verið á vegum Róberts en hins vegar hafi hann viljað koma sér í mjúkinn hjá honum með von um fyrirgreiðslu og fjármögnun en vefmiðill hans 24 punktur is var þá kominn í greiðsluþrot.

Reynir segir hins vegar það liggja fyrir að Róbert tengist málinu. Til að mynda liggi fyrir að tvær 500 þúsund króna greiðslur hafi runnið til Kristjóns Kormáks eftir að fyrir lá að hann hafði tölvu Reynis undir höndum. Róbert hefur fyrir sína parta hafnað því að hafa nokkuð með innbrotið að gera.

„Það er búið að taka skýrslu. Ég lagði fram gögn í málinu sem er meðal annars framburður Kristjóns Kormáks sem lýsir því að Róbert var kunnugt um hvað hann hafði gert. Án þess að upplýsa það. Og 18. febrúar lýsti Kristjón Kormákur því yfir að hann ætlaði að játa en fékk ekkert svar frá Róberti,“ segir Reynir sem velkist ekki í vafa um að aðkoma Róberts sé fyrirliggjandi.

Sakaði Reyni um að hafa sviðsett innbrotið

Reynir telur það svo lýsa verulegri ósvífni af hálfu Róberts Wessman að hafa á sama tíma kært Reyni til fjölmiðlanefndar og siðanefndar Blaðamannafélags Íslands.

„Þar sem látið er að því liggja að ég hafi sviðsett innbrotið. Vitandi hver er gerandinn í málinu hélt þann þessu samt fram! 

Hann tók virkan þátt í að fela slóðina með því að leggja út fyrir nýjum farsímum fyrir Kristjón. Samkvæmt framburði Kristjóns spyr Róbert hann hvort einhver hætta sé á að þetta komist fram. Kristjón sagði honum þá að það væri hægt að rekja farsíma. Þá voru lagðar inn hjá honum tvisvar sinnum fimm hundruð þúsund krónur fyrir nýjum símum. Ólafur Kristinsson lögmaður Róberts hefur verið tvísaga í málinu,“ segir Reynir.