Vildi sannfæra þjóðina um árangur sinn

Þá lýsti forsetinn yfir stuðningi við Úkraínumenn en í upphafi ræðu hans bað hann þingmenn beggja flokka um að standa upp og heiðra úkraínsku þjóðina, við mikil fagnaðarlæti þingmanna.

„Pútín [forseti Rússlands] getur umkringt Kænugarð með skriðdrekum en hann mun aldrei vinna sér hjörtu og sál úkraínsku þjóðarinnar,“ sagði Biden. Hann sagði að Úkraínumenn myndu enn berjast fyrir frelsi.

Ræða Bidens var 62 mínútna löng og fór hann um víðan völl. Vinsældir hans í Bandaríkjunum hafa aldrei mælst lægri en nú og þarf hann að snúa þeirri þróun með tilliti til þess að þingkosningar verða haldnar vestanhafs seinna á þessu ári.

Fjallaði um þörfina á að standa í hárinu á einræðisherrum

Varðandi Úkraínu lofaði Biden heimamenn fyrir varnir þeirra og ræddi um nýjan kraft meðal vesturveldanna svokölluðu sem ynnu að því að aðstoða Úkraínumenn með vopnasendingum og umfangsmiklum refsiaðgerðum gegn Rússlandi.

„Það ætti ekki að þurfa eitthvað svo hræðilegt svo heimurinn sæi hvað væri í húfi en nú sjá það allir skýrt,“ sagði Biden. „Í baráttunni milli lýðræðis og alræðis, eru lýðræðisríki að rísa upp og heimurinn er bersýnilega að velja frið og öryggi.“

Biden varaði við því að refsiaðgerðir gegn Rússlandi myndu að einhverju leyti koma niður á hagkerfi Bandaríkjanna en ef ekki yrði haldið aftur af Vladimír Pútín, forseta Rússlands, núna yrði það dýrara seinna meir.

„Í gegnum sögu okkar höfum við lært þá lexíu að þegar einræðisherrar gjalda ekki fyrir árásir þeirra, valda þeir meiri óreiðu. Þeir halda áfram og kostnaðurinn og ógnin gagnvart Bandaríkjunum eykst,“ sagði Biden.

Hér má sjá samantekt AP fréttaveitunnar yfir það helsta sem Biden sagði í stefnuræðu sinni í nótt.

Í grein Politico segir að í stuttu máli hafi ræða Bidens gengið út á það að sannfæra Bandarísku þjóðina um að hann hefði staðið sig vel í starfi, eins og allar stefnuræður forseta Bandaríkjanna snúast um.

Demókratar óttast að líkur þeirra til velgengni í komandi kosningum séu slæmar og Biden hefur þurft að vera í varnarstöðu gegn Repúblikönum síðustu mánuði.

Biden nefndi að hann hefði tilnefnt þeldökka konu til Hæstaréttar Bandaríkjanna og ítrekaði að ríkisstjórn hans hefði komið tveimur gífurlega mikilvægum frumvörpum í gegnum þingið. Þar á meðal frumvarp um fjárveitingar til innviðabyggingar og viðgerða í Bandaríkjunum, sem Biden sagði mikla þörf á.

Hann nefndi einnig að hann hefði lækkað lyfjaverð, gert barnaumönnun ódýrari, hækkað skatta á ríka og gripið til aðgerða til að halda aftur af veðurfarsbreytingum.

Biden nefndi einungis einu sinni kosningar í Bandaríkjunum og það var þegar hann gagnrýndi viðleitni Repúblikanaflokksins til að gera fólki erfiðara að kjósa víðsvegar um Bandaríkin.

Hann sagði kosningaréttinn einn helsta rétt Bandaríkjanna og að sá réttur væri í hættu.

„Í ríki eftir ríki er búið að setja ný lög, ekki bara til að gera fólki erfiðara að kjósa, við höfum séð það áður, heldur til að breyta niðurstöðum kosninga,“ sagði Biden.

Sjá einnig: Repúblikanar vilja stjórna hverjir kjósa og hvernig atkvæði eru talin

Þá lofaði Bidens árangur Bandaríkjanna gegn kórónuveirunni og sagði að áhersla ríkisstjórnar hans á bólusetningar hefðu skilað þeim árangri sem hefði náðst.

Hér má sjá ræðu Bidens í heild sinni.