Eltihrellir dæmdur í fimmtán mánaða fangelsi

Hinrik Ingi Óskarsson heitir sá dæmdi en hann hefur endurtekið verið til umfjöllunar í fjölmiðlum undanfarin ár. Hann var í fremstu röð í Crossfit hér á landi en var meinuð þátttaka í mótum eftir að hafa endurtekið fallið á lyfjaprófi.

Rauf nálgunarbann

Dómur var kveðinn upp í Héraðsdómi Reykjaness í dag. Ákæran á hendur Hinrik Inga var fjölmörgum liðum. Sá fyrsti og ítarlegasti snýr að frelsissviptingu og ráni frá því 23. nóvember 2020.

Þar var Hinrik Inga gefið að sök að hafa svipt karlmann frelsi sínu í rúma klukkustund með þeim hætti að Hinrik Ingi sótti hann á heimli hans, tók hann við annan mann upp í bíl þar sem hann tók iPhone 11 síma hans af honum og sló með krepptum hnefa í búk.

Við Hamraborgina í Kópavogi gerði karlmaðurinn tilraun til að hlaupa undan Hinrik Inga sem náði honum, sló með krepptum hnefa í búkinn og tók um háls hans og þrengdi að. Ók hann áfram með hann um höfuðborgarsvæðið og hafði í lífláts- og líkamsmeiðingarhótunum við han vegna samskipta hans við fyrrverandi unnustu Hinriks Inga.

Hafði hann í hótunum að drepa karlmanninn, fjölskyldu hans og hundinn hans. Kveikja í húsnæði og bílum í þeirra eigu leitaði hann til lögreglu. Að lokum pantaði Hinrik Ingi leigubíl, skipaði manninum upp í og var honum skutlað heim.

Hinrik Ingi var úrskurðaður í nálgunarbann gegn fyrrnefndum karlmanni en rauf það endurtekið með því að hafa ítrekað og sem mánuðum skiptir hringt í hann og fjölskyldu hans, dag sem nótt.

Var Hinrik dæmdur til að greiða viðkomandi 650 þúsund krónur í bætur auk vaxta.

Skorið á dekk

Svala Lind Ægisdóttir, móðir brotaþola í málinu, steig fram í viðtali við Ísland í dag í mars í fyrra. Þar lýsti hún ofsóknum og hótunum í garð sonar hennar og fjölskyldunnar.

„Honum er sem sagt hótað, að ef við munum snúa okkur til lögreglu eða segja frá þá munum við öll láta lífið. Við erum öll talin upp í röð. Svo hefjast endalaus símtöl, No caller ID símtöl, úr hans eigin síma, skilaboð, skilaboð í gegnum annað fólk, hótanir í gegnum annað fólk, hótanir í gegnum Instagram. Að keyra fyrir utan heima hjá okkur með látum, með mjög annarlegu aksturslagi fram og til baka í rólegu fjölskylduhverfi. Hann áreitir okkur á vinnustað, kemur á vinnustaðinn okkar,“ sagði Svala Lind.

Þá grunaði Svala Lind hann um að hafa brotið framrúðu á bíl sínum auk þess sem hann var handtekinn fyrir að hafa skorið á dekk á bíl hennar. 

Var Hinrik Ingi dæmdur fyrir að skera á dekkin en upptaka af því náðist á öryggismyndavél. Hann virðist þó ekki hafa hlotið dóm fyrir að brjóta framrúðu á bíl fjölskyldunnar og má telja líklegt að sönnunargögn hafi skort.

Missir prófið í 42 mánuði

Hinrik játaði einnig að hafa slegið karlmann í andlitið í anddyri húss á Seltjarnarnesi í maí 2020. Hlaut viðkomandi nefbrot, tognun á kjálka og bar á kinn. Var Hinrik dæmdur til að greiða honum 350 þúsund krónur í bætur. Þá var hann tekinn með kókaín í bíl sínum og undir áhrifum slævandi lyfja og fíkniefna við akstur í þrígang.

Þá var hann dæmdur fyrir umferðarlagabrot með því að hafa ekið bíl sínum gegn rauðu ljósi við gatnamót Suðurlandsbrautar og Álfheima á annan bíl í maí 2021. Hljóp hann af vettvangi brotsins. Þá hafnaði hann í eitt skipti á grindverki utan vegar við Vesturvör í Kópavogi með mikið magn kókaíns í blóði sínu.

Í ljósi þess að Hinrik Ingi hafði ekki áður hlotið refsingu fyrir lagabrot þótti fimmtán mánaða dómur hæfileg refsing, þar af tólf mánuðir á skilorði. Var hann sviptur ökuréttindum í þrjú og hálft ár. Þá var hann dæmdur til að greiða hinum brotaþolunum, þeim sem hann kýldi á Seltjarnarnesi og móður þess sem hann frelsissvipti, 418 þúsund krónur annars vegar og 284 þúsund krónur hins vegar í bætur.

Á dögunum birtist myndband af karlmanni ganga berserksgang á Reykjanesbraut. Samkvæmt heimildum fréttastofu er um að ræða Hinrik Inga. Hann var handtekinn í kjölfarið og er málið til rannsóknar hjá Lögreglunni á Suðurnesjum.