Afturelding vann Selfoss í sveiflukenndum leik

Afturelding gerði fyrsta mark leiksins en stuttu síðar tóku gestirnir frá Selfossi yfir og Selfyssingar leiddu leikinn allan fyrri hálfleik og voru þremur mörkum yfir í hálfleik, 12-15. 

Heimamenn í Aftureldingu byrjuðu seinni hálfleikinn betur og náði að minnka muninn niður í eitt mark með fyrstu tveimur mörkum síðari hálfleiks. Selfoss hélt þó forystunni alveg þangað til rúmar 10 mínútur voru eftir en þá ná heimamenn forskotinu með marki Þorsteins Leós Gunnarssonar í stöðunni 26-25. 

Leikurinn var í járnum síðustu tíu mínúturnar og bæði lið skiptast á því að leiða leikinn þangað til heimamenn ná tveggja marka forystu þegar þrjár mínútur lifðu eftir af leiknum. Afturelding hélt út þrátt fyrir hetjulega baráttu hjá Selfossi, lokatölur 33-31 fyrir Mosfellinga.

Afturelding jafnar KA að stigum í sjöunda sæti en bæði lið eru nú með 14 stig, stigi á eftir Selfossi sem er í sjötta sæti.

Birkir Benediktsson var markahæstur hjá Aftureldingu með 8 mörk úr 9 skotum en Selfyssingarnir Einar Sverrisson og Guðjón Baldur Ómarsson voru markahæstu leikmenn vallarins með 9 mörk hvor. Guðjón í jafn mörgum skotum en Einar í 13 skotum.