Al­manna­varnir funda með við­bragðs­aðilum vegna lægðarinnar

Á fundinum voru einnig fulltrúar úr aðgerðastjórnum almannavarna um allt land þar sem farið var yfir veðurspár og til hvaða viðbúnaðar þyrfti að grípa. Þetta kemur fram í tilkynningu frá almannavarnadeild ríkislögreglustjóra en áðurnefndir aðilar undirbúa nú allir sínar aðgerðir vegna veðursins. Hópurinn hyggst funda aftur á morgun.

Gefnar hafa verið út appelsínugular veður viðvaranir fyrir allt landið sem byrja að taka gildi aðfaranótt mánudags og gildir fram yfir hádegi á mánudag. Um er að ræða sérlega djúpa lægð sem nálgast landið úr suðvestri. 

Mikil hætta á foktjóni og rafmagnstruflunum

Að sögn almannavarna eru líkur á því að áhrif veðursins verði umtalsverð og einnig líkur á að veðrið haldi áfram að hafa áhrif fram á þriðjudag. Mikil hætta er sögð á foktjóni, rafmagnstruflunum auk þess sem samgöngur munu raskast verulega um tíma.

Almannavarnir biðla til fólks að ganga vel frá lausamunum og eru verktakar beðnir um að ganga vel frá framkvæmdarsvæðum. Ferðaþjónustuaðilar eru einnig beðnir um að koma skilaboðum til ferðamanna sem á þeirra vegum og láta vita hverju von er á.

Fylgjast má með framvindu veðursins á vef Veðurstofu Íslands, vegum og lokunum á vef Vegagerðarinnar og sömuleiðis ölduhæð.