Dag­ný kom inn af bekknum og skoraði eftir að­eins þrjár mínútur

West Ham United heimsótti Sheffield United í FA-bikarnum á Englandi í dag. Dagný Brynjarsdóttir hóf leik á varamannabekk West Ham en kom inn á og skoraði síðasta mark liðsins í 4-1 sigri.

Dagný var hvíld framan af leik enda Sheffield United deild neðar en West Ham sem leikur í ensku úrvalsdeildinni í knattspyrnu. Leikurinn hófst af krafti og var staðan 1-1 eftir aðeins fimm mínútna leik.

West Ham leiddi þó 2-1 í hálfleik þökk sé marki eftir rúmar tuttugu mínútur og staðan var orðin 3-1 er Dagný kom inn af bekknum. Það tók íslensku landsliðskonuna ekki langan tíma að setja mark sitt á leikinn en aðeins þremur mínútum síðar skoraði hún og gulltryggði 4-1 sigur West Ham.

Lundúnaliðið þar með komið í 5. umferð FA-bikarsins.