Sextán ára kvikmynd margoft hjálpað Newcastle að fá leikmenn

Eftir að Sádi-Arabar tóku yfir Newcastle í haust er þess beðið með eftirvæntingu í borginni hvaða leikmenn verða keyptir þegar félagaskiptaglugginn opnast nú um áramótin. Nú hefur félagið úr nægum fjármunum að spila og getur heillað leikmenn með vænum launapakka en það hefur ekki alltaf verið raunin.

BBC fjallar um það í dag að það hafi spilað inn í ákvörðun margra leikmanna í gegnum tíðina, um að koma til Newcastle, að hafa séð kvikmyndina Goal. Hún fjallar um ungan Mexíkóa sem fer til Newcastle og verður stjarna í ensku úrvalsdeildinni.

Markahæsti maður Newcastle í vetur, Callum Wilson, kom til að mynda frá Bournemouth sumarið 2020 þrátt fyrir áhuga Aston Villa. Þegar hann útskýrði val sitt sagði hann meðal annars:

„Sonur minn er að komast á þann aldur að hann horfir meira á kvikmyndir og fótbolta. Hann horfði á Goal! svo að ég sá hana með honum og þar snerist allt um Newcastle. Þetta gerði strákinn í mér spenntan og maður hugsaði með sér, já, þetta er félagið fyrir mig.“

Mexíkóskur táningur kominn til Newcastle

Argentínumaðurinn Jonas Gutierrez kom frá Mallorca árið 2008. Í fyrra sagði hann það alltaf hafa verið draum sinn að spila í ensku úrvalsdeildinni og að hann hefði meðal annars þekkt Newcastle vegna Goal.

Miðjumaðurinn Isaac Hayden sagði eitt sinn: „Ég man alltaf eftir því þegar ég sá Goal. Ég var bara stráklingur og man að ég hugsaði: Vá, ef þeir eru að gera kvikmynd um Newcastle þá hlýtur það að vera svakalegt félag.“

BBC nefnir fleiri leikmenn á borð við Alsírbúann Islam Slimani, franska bakvörðinn Massadio Haidara, senegalska framherjann Papiss Cisse og brasilíska miðjumanninn Kenedy, sem allir nefndu myndina þegar þeir voru spurðir hvers vegna þeir hefðu valið Newcastle.

Nokkur eftirvænting ríkir svo vegna þeirrar staðreyndar að mexíkóskur táningur, Santiago Munoz, kom til Newcastle fyrr á þessu ári en hann spilar með U23-liði félagsins.